काठमाडौं १७ चैत/राजधानीको रत्नराज्य लक्ष्मी (आरआर) क्याम्पसको स्वतन्त्र विद्यार्थी युनियनमा अनेरास्ववियुका तपेन्द्रबहादुर शाहीको प्यानल निर्वाचित भएको छ । शाहीले ६९९ मत पाए भने उनका प्रतिस्पर्धी नेविसंघका उत्तमबहादुर साउदले ३६७ मत प्राप्त गरे ।

सचिवमा नारायण शर्मा, कोषाध्यक्षमा संगम देवकोटा निर्वाचित भए । सदस्यमा दिनेश बजगाईं, सुजिता धिताल, जनक शाही, श्यामबहादुर विक, उर्वशीसिंह नेपाली, दीपक खतिवडा, मदन भण्डारी र उज्ज्वल न्यौपाने निर्वाचित भए । फागुन १८ गते हुन नसकेको निर्वाचन मंगलबार गराइएको हो । उता, माओवादी केन्द्रनिकट अखिल (क्रान्तिकारी) ले भने निर्वाचनविरुद्ध सर्वोच्च अदालतमा रिट दायर गरेको छ । सर्वोच्चको आदेशविपरीत स्ववियु चुनाव गराइएको भन्दै क्रान्तिकारीले रद्द गर्न माग गर्दै बुधबार मुद्दा दर्ता गराएको हो । सर्वोच्चले पुरानै अवस्थाबाट प्रक्रिया अगाडि बढाएर निर्वाचन गर्न आदेश दिएकोमा नेविसंघलाई पनि मनोनयन दर्ता गराएर निर्वाचन गरेको क्रान्तिकारीको दाबी छ । क्रान्तिकारीका तर्फबाट ध्रुवराज वाग्लेले रिट दायर गरेका छन् ।

कान्तिपुरमा प्रकाशित खबर ।