काठमाडौं २० फागुन/ स्वतन्त्र विद्यार्थी युनियन (स्ववियु) चुनावमा तीन प्रमुख विद्यार्थी संगठनले मिश्रित परिणाम प्राप्त गरेका छन् ।

त्रिभुवन विश्वविद्यालयका २१ आंगिक क्याम्पस र अन्य सम्बन्धन तथा नेपाल संस्कृत विश्वविद्यालयका केही आंगिक क्याम्पस गरी करिब २ सय ३० क्याम्पसमा बुधबार स्ववियु चुनाव सम्पन्न भएको थियो ।
विद्यार्थी संगठनहरूको दाबी अनुसार नेपाल विद्यार्थी संघ (नेविसंघ) ले १ सय ५ क्याम्पसमा स्ववियु सभापतिलगायत पदमा विजय पाएको छ ।
त्यसैगरी अनेरास्ववियुले १ सय १ स्थानमा सभापतिलगायत पदमा जित हासिल गरेको जनाएको छ । माओवादी केन्द्रनिकट अखिल (क्रान्तिकारी) ले ७३ वटा क्याम्पसमा सभापतिलगायत स्थान विजय पाएको दाबी गरेको छ । स्ववियु चुनाव सम्पन्न क्याम्पस संख्याअनुसार विद्यार्थी संगठनको दाबी मिलेको छैन । संगठनहरूले एक–अर्कालाई संख्या बढाएर दाबी गरेको आरोप पनि लगाएका छन् ।
त्रिवि शिक्षाध्यक्ष प्राध्यापक सुधा त्रिपाठीले क्याम्पस प्रशासनले स्ववियु चुनाव सम्पन्न गराएकाले नतिजा आउन ढिलो हुने बताइन् । ‘एकाध क्याम्पसमा प्राविधिक कारणले स्ववियु चुनाव भोलि (शुक्रबार) मात्र हुन्छ । त्यसैले सबैतिरको नतिजा आउन समय लाग्छ,’ उनले भनिन् ।
यसअघि २०६५ सालमा स्ववियु चुनाव भएको हो । त्रिविले यस वर्ष मिश्रित प्रणाली र समावेशी नीतिअनुसार चुनाव गराएको हो । देशभरिका ६० आंगिकमध्ये २१ वटा क्याम्पसमा मात्र स्ववियु चुनाव भएको जनाइएको छ । विद्यार्थी संगठनले आफ्नो पकड गुमाउन सक्ने क्याम्पसमा अवरोध पुर्‍याएर चुनावी प्रक्रिया रोकेका थिए । राजधानीका शंकरदेव, आरआर, पिपल्स क्याम्पस र अन्य केही क्याम्पसमा विद्यार्थी संगठनहरूको सहमतिमा फागुन २३ गतेभित्र चुनाव गराउनुपर्ने नेविसंघका महामन्त्री सरोज थापाले बताए । ‘हामी विद्यार्थी संगठन सहमति गर्न तयार छौं, त्रिविले हाम्रो माग सुन्न जरुरी छ,’ उनले भने ।
यसैबीच भक्तपुरका दुई क्याम्पसको मतपरिणाम सार्वजनिक भएको छ । भक्तपुर बहुमुखी क्याम्पसमा दिनेश खड्गी नेतृत्वको नेक्राविसंघ र नेविसंघको संयुक्त प्यानल विजयी भएको छ ।
यस्तै सानोठिमी क्याम्पसमा रमेश खड्काको नेतृत्वमा अखिल क्रान्तिकारी र नेविसंघको संयुक्त प्यानल विजयी भएको छ ।

कान्तिपुरमा प्रकाशित खबर ।