- चर्चित ढुंगेल / जीवन र भोगाईलाई विषयबस्तु बनाएर कविता तथा गीत सृजना गर्ने सर्जक हुन् । रेगिस्तान र सपना (साहित्यिक संग्रह– सन् २०१२) तथा कन्काईका सुस्केरा (गजल संग्रह सन् – २०१५) गरी दुईवटा पुस्तकमा संयुक्त लेखन गरेका उनका डेढ दर्जन गीत रेकर्ड भईसकेका छन् । एराईवल, विचार र कहरवा गरी तीनवटा एल्वममा उनका गीत संग्रहित छन् । भारतको आसाममा जन्मेर झापाको शिवगञ्जमा हुर्के बढेका उनी हिजो आज भक्तपुरको नगरकोटमा बस्छन् । बैदेशिक रोजगारी र सीपमा केन्द्रित अनलाईन देश परदेश डट कमका स्तम्भकार समेत रहेका ढुंगेल, सन् २०११ मा ब्रुनाईमा भएको खुल्ला नेपाली अन्र्तराष्ट्रिय अडियो कविता प्रतियोगितामा पहिलो भएका थिए । यो हप्ताको शिक्षा साहित्य श्रृखलामा उनकै कविता सपनाको अवसान

जसरी गोधुलीको पूर्व सन्ध्यामा

झुल्किन्छन् एक हूल ताराहरु

ठिक त्यसै गरि-

मान्छे नजन्मिदै जन्मिन्छ सपना

बाबुआमाका रहर र चाहनासँगै

बर्षहरु खाएपछि हुर्किन्छ सपना

क्रमशः बालक किशोर र जवान भएर

तन्नेरीसँगै कलेज जान्छ सपना

कुनै सपना अधुरै हुन्छ र रहन्छ

दागी लागेर पढ्नै छोडेको विद्धार्थी जस्तो ।

 

कुनै उच्चतहको प्रमाणपत्र बोकेर

लाग्छ जुत्ता खियाउँदै शहरतिर सपना

शहरमा सपनाले हाल्छ हांगा र पात ।

 

शहरमा प्रमाणपत्र नबिकेपछि

शहरमा सपना नटिकेपछि

अन्तिम बिकल्प रहन्छ सपनासँग

र लाग्छ हरियो बाँस जस्तै

हरियो पासपोर्ट बोकेर

ल्याकत अनुसारको देश

अमेरिका बेलायत अष्ट्रेलिया

जापान सिंगापुर मलेशिया

वा म जस्तै रेगिस्तानतिर

आफ्नै पैसाले बेचिएर

आफ्नै मलामी बन्न ।

 

रेगिस्तानमा आएको सपना

बर्षै पिच्छे सपनामै सिमित हुन्छ

दशैँ, तिहार, तीजमा,

ल्योछार, फगुवा, इदमा,

साकेला, उँभौली र उँधौलीमा

डाको छोडेर रुन्छ सपना

मुलुक सम्झेर रुन्छ सपना ।

 

कति सपना सवारीमा किचिएर मर्छन्

कति सपना टोपी खस्ने टावरबाट खसेर मर्छन्

कति सपना मर्छन् समुन्द्रमा डुबेर

तातो घाममा रन्थनिएर मर्छन् कति सपना

मर्छन् कति सपना विजुली लागेर

तर पनि किन देख्न छोड्दैन मान्छेले सपना ?

 

दिनहरु महिनामा फेरिन्छन्

सपना सपना नै रहन्छ

महिनाहरु बर्षमा बद्लिन्छन्

सपना फेरि सपना नै रहन्छ

बर्षहरु दसक दसकहरु रतज

र रजतहरु शताब्दीमा फेरिन्छन्

तर पनि सपना सपनामै सिमित रहन्छ

 

कसले देखायो यस्तो सपना

जो भत्किन्छ खोलाका किनार जस्तै भएर

र एकदिन मर्छ सपना विपना नभइ

सुतेको सुत्यै भएर ।