Tikaram Yatri

नेपालमा निजी विद्यालय खुलेदेखि नै टाइ संस्कृति भित्रिए पनि योे आम प्रबृति र प्रचलन भइसकेको थिएन । तर पछिल्ला बर्षहरुमा सामुदायिक विद्यालयहरुले पनि अंग्रेजी माध्यमलाई अनिवार्य बनाए जस्तै यो गलपासोलाई पनि बाध्यात्मक बनाउनु त्यही आधुनिक हुने नाममा पश्चिमी हुने होडको द्योतक हो । पाल्पाली ढाका टोपी र भाद्गाउने टोपीलाई राजामहाराजा र शासकको पोशाक बताउनेहरु समेत टाइको सांस्कृतिक पहिचानबारे बेखबर रहनु ताजुब लाग्दो बिषय हो । अरु त अरु राजनीतिज्ञ, उच्च प्रशासक तथा कथित कुलिनहरुको शिरमा देखिने टोपी र गालामा लड्किएको टाइ हाइब्रिडका नाममा भाग्राको टोपीमा गुयलाको फूल प्रतित हन पुगेको छ । परस्पर विपरित मुल्य संस्कृति बोक्ने पोशाक एकै पटक पहिरिनु फ्युजन होइन कन्फ्युजन हो ।