विहीबार, १६ बैशाख २०७३
काठमाडौँ, १६ बैशाख । डडेल्धुरा बहुमुखी क्याम्पसमा विद्यार्थीद्वारा लगाइएको ताला झन्डै दुई महिनापछि खुलेको छ । कर्मचारीको भर्नाको विषयलाई लिएर गएको फागुन २१ गते क्याम्पसमा अध्ययनरत चार वटा विद्यार्थी सङ्गठनले गरेको तालाबन्दी बुधबार खुलेको हो ।
कर्मचारीको भर्नाको विषयमा अनेरास्ववियु, अखिल क्रान्तिकारी, अखिल छैटौँ, अखिल क्रान्तिकारी र क्याम्पस प्रशासनबीच सात बँुदे सहमति भएपछि ताला खोलिएको विद्यार्थी सङ्गठनले एक विज्ञप्तिमार्फत जानकारी दिएको छ ।
कर्मचारी भर्ना प्रक्रियालाई तत्काल अगाडि बढाउने, फर्जी विद्यार्थी विवरण छानबिन गरी त्रिविको नियमानुसार कारबाही गर्ने र बेरुजु देखिएको रु एक करोड ९५ लाख रकमको विषयमा कार्यदल गठन गरी छानबिन गर्ने सहमति भएको बताइएको छ ।
क्याम्पस प्रशासन र विद्यार्थी सङ्गठनबीच भएको सहमतिका आधारमा ताला खोली प्रशासनिक कामकाज अगाडि बढाइएको क्याम्पस स्रोतले जानकारी दिएको छ ।
रासस
प्रतिक्रिया