काठमाडौ– व्यवस्थापिका–संसद्, कृषि तथा जलस्रोत समितिले विश्वविद्यालयमा अध्ययनरत विद्यार्थीलाई कृषि कर्ममा लागउने नीतिगत ब्यवस्था गर्न शिक्षा मन्त्रालयलाई निर्देशन दिएको छ । कृषि विकास र शिक्षा मन्त्रालयलाई निर्देशन दिदैं समितिले त्रिभुवन विश्वविद्यालय र कृषि तथा वन विश्वविद्यालयमा अध्ययनरत विद्यार्थीलाई कम्तीमा ६ महिना अनिवार्य रुपमा कृषि कर्ममा खटाउन निर्देशन दिएको हो ।

सोमबार बसेको समितिको बैठकले चिकित्सा शिक्षामा अनिवार्य रुपमा प्रशिक्षार्थीका रुपमा काम गर्नुपर्ने व्यवस्था भए जस्तै कृषिमा पनि सोही व्यवस्था गर्न सकिए प्रभावकारी हुने भन्दै निर्देशन दिएको सभापति गगन थापाले बताए ।
बैठकमा कृषि विकास मन्त्रालयले सात वटै प्रदेशमा कृषि क्षेत्रको विकासका लागि १ सय ८५ वटा विशेष क्षेत्र स्थापना गर्ने लक्ष्यसहित आर्थिक वर्ष २०७३/७४ को कार्यक्रम प्रस्ताव गरेको छ ।

कृषि विकासमन्त्री हरिबोल गजुरेलले धान, मकै, तरकारी, माछा, मसला तथा नगदे बालीलाई व्यावसायिक तथा अत्याधुनिक प्रविधिमार्फत अगाडि बढाउने गरी कार्यक्रम प्रस्ताव गरिएकोसमितिको बैठकम जानकारी गराए ।

प्रकाशित मिति २०७२ चैत २९ गते