काठमाडौं - शिक्षकको सडक प्रर्दशन निरन्तर रहेका कारण अन्योलमा परेको कक्षा १२ को परीक्षा शान्तिपुर्वक सञ्चालनको वातावरण बनाउन राष्ट्रिय मानव अधिकार आयोगले सरकारलाई पत्राचार गरेको छ । आउँदो बिहीबारबाट शुरु हुने गरी तय गरिएको उक्त परीक्षा सञ्चालन नहुँदा विद्यार्थीको अमूल्य समय खेर जाने र अभिभावक एवं राज्यले १२ बर्ष सम्म गरेको लगानीको पनि औचित्य नहुने भन्दै परीक्षा सञ्चालनका लागि आवाज उठ्दै आएको छ । 

आईतबार मात्रै अभिभावक संघ नेपालले ध्यानाकर्षण गराएको उल्लेख गर्दै आयोगले आईतबार नै सरकारलाई परीक्षा सञ्चालन गरी बालबालिकाको अधिकार संरक्षण गर्न पत्राचार गरेको जनाएको छ ।

'नेपालको संविधानको धारा ३१ र ३९ द्वारा प्रदत्त बालबालिकाको मौलिक हक संरक्षण गर्दै आन्दोलनरत शिक्षक महासंघसँग विगतमा भएका सम्झौता कार्यान्वयन गर्न र कक्षा १२ को परीक्षा शान्तिपुर्वक सञ्चालन हुने वातावरण मिलाउन अनुरोध गरिएको छ' पत्रमा भनिएको छ । 

समस्याको सम्बोधन समयमै हुन नसकेमा लाखौं विद्यार्थीमा मनोवैज्ञानिक रुपमा दूरगामी असर पर्न सक्ने, शैक्षिक क्यालेण्डर नै प्रभावित भई समग्र शिक्षा प्रणालीमै नकारात्मक प्रभाव पर्न सक्ने आयोगले स्मरण गराएको छ । शिक्षकका माग वार्ताबाट समाधान गर्न पनि आगोगले अनुरोध गरेको छ । 

जारी शिक्षक आन्दोलनका कारण सामुदायिक विद्यालयका करिब ५५ लाख विद्यार्थीको पढ्न पाउने अधिकार हनन् भएको भन्दै संघले आयोगको ध्यानाकर्षण गराएको थियो । 

शिक्षकको असहयोग घोषणाका कारण कक्षा १२ को परीक्षाको तयारीमा रहेका झण्डै पाँच लाख विद्यार्थीको भविष्य नै अन्योलमा परेको छ । शिक्षक आन्दोलनले निकाश नपाउँदा ती विद्यार्थीको भविष्य माथि नै प्रश्न उब्जिएको छ । यसले विद्यालय शिक्षाको अन्तरराष्ट्रिय छवि मै नकारात्मक असर पर्ने देखिएको छ । 

शिक्षकको सडक प्रर्दशनले निकास नपाउँदै २० औ दिनमा शिक्षा मन्त्री विद्या भट्टराईले राजिनामा दिए पछि अवस्था थप पेचिलो बनेको छ ।  

यस पटक कक्षा १२ को परीक्षाका लागि जापान सहित एक हजार पाँच सय ९१ परीक्षा केन्द्र निर्धारण गरिएको छ ।  त्यति नै संख्यामा केन्द्राध्यक्ष र सहायक केन्द्राध्यक्ष परीक्षामा संलग्न हुने योजना बनाईएको छ ।

परीक्षामा १८ सय देखि दुई हजार कर्मचारी, हरेक केन्द्रमा कम्तिमा एक जना कार्यालय सहयोगी र २० हजार  सुरक्षाकर्मी परिचालन हुने परीक्षा बोर्डले जनाएको छ । 

यस्तै नतिजा प्रकाशनमा शिक्षकको असहयोग घोषणाका कारण कक्षा १० को अन्तिम परीक्षा दिएर बसेका पाँच लाख १४ हजार १७ विद्यार्थीको कापी परीक्षणको काममा एक साता ढिलो भईसकेको छ । १५ दिन भित्र कापी परीक्षण सक्ने गरी बोर्ड अन्तरगतको परीक्षा नियन्त्रण कार्यालय कक्षा १० ले योजना बनाएको थियो । विषयगत रुपमा तीन हजार शिक्षक परीचालन गरेर १५ दिनमा काम सक्ने योजना बनाएको कार्यालयका नियन्त्रक गणेश भट्टराईले बताए । 

अहिले विद्यार्थीका कापी देशभर निर्धारण गरिएको ५० वटा केन्द्रमा पुगिसकेको बताउँदै उनले एक दुई दिनमा काम शुरु भयो भने पनि अतिरिक्त समय लगाएर परीक्षण गर्न सक्ने बताए । एक जना शिक्षकले दिनमा एकसय कापी जाँच्ने छन् भन्ने आाधरमा परीक्षणको लागि १५ दिनको समय निर्धारण गरिएको उनले बताए । कार्यालयले परीक्षा सकिएको तीन महिनामा नतिजा निकाल्ने योजना बनाएको छ । उक्त योजना अनुसार असार ७ गते तिर नतिजा सार्वजनिक गर्ने कार्यतालिका तयार गरेको छ ।  

आफ्नो वृत्ति विकास एवं विभिन्न पेशागत माग सहित देशभरका सामुदायिक विद्यालयका शिक्षकहरुले चैत २० गते देखि काठमाडौंको सडक केन्द्रित प्रर्दशन गरिरहेका छन् । उनीहरुले चैत २५ गते देखि घोषणा गरेको शैक्षिक हड्तालका कारण नयाँ शैक्षिक सत्रको शुरुवात, भर्ना अभियान, विद्यार्थीको पठन पाठन, परीक्षा, नतिजा प्रकाशन, विद्यालय भर्ना जस्ता शैक्षिक गतिविधि ठप्प छन् ।