काठमाडौं - १३ दिन देखि काठमाडौं केन्द्रित सडक प्रर्दशन गर्दै आएको नेपाल शिक्षक महासंघले कक्षा १२ को परीक्षामा असहयोग गर्ने निर्णय गरेको छ । सोमबार बसेको महासंघको राष्ट्रिय समितिको बैठकले परीक्षा लगायतका कुनै पनि शैक्षिक कृयाकलापमा सहयोग नगर्ने निर्णय गरेको महासंघका अध्यक्ष लक्ष्मीकिशोर सुवेदीले बताए । 

'हामीले आज कक्षा १२ को परीक्षामा शिक्षक कर्मचारी संलग्न नहुने निर्णय गरेका छौं' उनले भने 'हामी जीवन मरणको लडाई लड्दै छौं, हामी त यस पटक फाईनल नगरी नजाने हो, राज्यले के सोचेको छ थाहा छैन हामी त जे जोखिम उठाएर पनि फाईनल गरेरै जाने हो ।' 

परीक्षा र उत्तरपुस्तिका परीक्षणमा संलग्न भई विद्यार्थीको जीवनको महत्वपूर्ण समयलाई ख्याल गर्न राष्ट्रिय परीक्षा बोर्डले आन्दोलनरत शिक्षकलाई अपिल गरेको चौथो दिनमा महासंघले परीक्षा नै हुन नदिने शैलीको निर्णय गरेको हो । कक्षा १२ को परीक्षा आउँदो ११ गतेबाट शुरु हुँदै छ ।  

सोमबारको बैठकमा अन्य साँगठनिक निर्णय हरु पनि भएका तर बताउँदै सुवेदीले मुलतः आन्दोलनलाई अझै बलियो बनाएर लैजाने, विद्यालयहरुलाई अझ कडाईका साथ ठप्प बनाएर लैजाने जस्ता निर्णय गरेको जनाए । 

पेशागत माग सहित महासंघको अगुवाईमा देशभरका शिक्षक गत चैत २० गते देखि सडक प्रर्दशनमा उत्रिएका छन् । २५ गते देखि महासंघले शैक्षिक हड्तालको समेत घोषणा गरेको छ । 

शिक्षकका माग पुरा गर्न शिक्षा मन्त्रालयले लिष्ट बनाएर एक एक माग केलाउँदै अन्तर मन्त्रालयगत समन्वय गरिरहेको शिक्षा मन्त्री विद्या भट्टराईले बताएकी छन् । 

पढ्नहोस् : परीक्षा र उत्तरपुस्तिका परीक्षणको जिम्मेवारी वहन गर्न आन्दोलनरत शिक्षकलाई बोर्डको अपिल