काठमाडौं - आन्दोलनरत शिक्षकलाई शिक्षा मन्त्रालयले वार्तामा बोलाएपछि नेपाल शिक्षक महासंघका पदाधिकारी छलफलमा जुटेका छन् । मन्त्रालयका प्रवक्ता शिवकुमार सापाकोटाले विज्ञप्ति जारी गर्दै साझा धारणा निर्माण गर्न नेपाल सरकार हमेसा तयार रहेको उल्लेख गरेका थिए । 

आन्दोलनरत शिक्षकलाई सरकारले बोलायो वार्तामा

उक्त विज्ञप्ति सार्वजनिक भएपछि शिक्षक नेताहरु छलफलमा जुटेका महासंघका एक नेताले बताए । आन्दोलन शुरु भए पछि त्यसको अन्त्यका बारेमा पनि उत्तिकै गम्भिर हुनु पर्छ भन्ने बारेमा आफूहरु सचेत रहेकोले वार्ताको वातावरण बन्नु सकारात्मक भएको ती नेता बताउँछन् । 

'केही मिडियामा सरकारले बोलाएको वार्ताको औचित्य छैन भन्ने धारणा प्रकाशित भएको पनि देखियो महासंघको औपचारिक निर्णय नभए सम्म हामीले बोल्न मिल्दैन, मेरो नाम पनि नखोल्नु होला' उनले भने 'सडकमा कराएर मात्रै त हुँदैन एक न एक पटक छलफलमा बस्नै पर्छ भने पछि किन मन्त्रालयको आह्वानलाई गम्भिरताका साथ नलिने ?' 

शिक्षा मन्त्रालयको विज्ञप्तिका बारेमा आफूहरुले पनि खबर पढेर थाहा पाएको बताउँदै उनले त्यसको बारेमा औपचारिक धारणा बनाउन महासंघका अध्यक्ष लक्ष्मी किशोर सुवेदी सहितका नेताहरु छलफलमा जुटेको बताए ।

 मन्त्रालयको विज्ञप्ति आए पछि दोश्रो दिन सडकमा प्रर्दशन गरिरहेका शिक्षकहरुले भने वार्ताको भुलभुलैयामा नफस्न नेतृत्वलाई सचेत गराएका छन् ।