काठमाडौं - शिक्षा विज्ञान तथा प्रविधि मन्त्री विद्या भट्टराईले कक्षा १० को अन्तिम परीक्षा एसईईलाई मर्यादित बनाउन निर्देशन दिने क्रममा व्यक्त भाषा बिबादमा परेको छ । मधेश प्रदेशका शिक्षा विकास तथा समन्वय एकाइका प्रमुखहरूसँगको सोमबारको अनलाइन बैठकमा भट्टराईले 'निजी प्रति 'अनुत्तरदायी' हुन दिएको निर्देशनको भाषा प्रति निजी विद्यालयका सञ्चालकहरुले आपत्ती जनाएका छन् । मन्त्रीले बोलेको भिडियोको सानो टुक्रा सामाजिक सञ्जालमा सार्वजनिक भएको छ । 

‘आफुलाई जनता प्रति उत्तरदायी बनाउनुहोस् । कुनै प्राइभेट विद्यालय प्रति र एउटा व्यक्ति प्रति अनुत्तरदायी बनाउनुहोस् । मेरो निर्देशन यही हो ।’ उक्त भिडियोमा मन्त्री भट्टराईले यस्तो भनेको देखिन्छ । 

मन्त्रीको उक्त भाषा प्रति प्याब्सनका निवर्तमान अध्यक्ष डिके ढुङ्गानाले आपत्ति जनाएका छन् । मन्त्रीको अभिव्यक्तिलाई लिएर सामाजिक सञ्जाल फेसबुकमा उनले सरकारले सामुदायिक र निजीमा विभेद गरेको भन्दै बिरोध जनाएका छन् । 

‘माननीय मन्त्रीज्यू  प्राइभेट राज्यको दायित्व भित्र पर्दैन ? सरकारले निश्चित समुदायका लागि मात्रै काम गर्ने हो र ? निजी क्षेत्रप्रति अनुत्तरदायी हुनु भन्नाले आम जनमानसले के बुझ्ने हो ?’ उनले सञ्जालमा लेखेका छन् ‘अभिभावकीय भूमिकामा रहनुपर्ने माननीय मन्त्रीज्यूबाट यस प्रकारको अभिव्यक्ति आउनु नागरिक प्रति सोझै गरिएको विभेद हो । ३० प्रतिशत विद्यार्थी अध्ययन गर्ने क्षेत्र पनि यहाँ कै मातहतमा छ भन्ने बिर्सनु त भएको होइन नि । यस प्रकारको विचार प्रति खेद छ ।’ 

यस्तै निजी विद्यालय सञ्चालकहरुको अर्को संगठन एन प्याव्सनका अध्यक्ष सुवास न्यौपानेले पनि मन्त्री भट्टराईको अभिव्यक्तिको विरोध गरेका छन् । 

‘माननीय मन्त्री ज्युबाट शिक्षा विकास समन्वय एकाइलाई दिएको निर्देशनात्मक अभिव्यक्तिमा प्राइभेट विद्यालय प्रति अनुत्तरदायी बन्नुहोस् भन्ने अभिव्यक्ति लज्जास्पद र विभेदकारी हुनुका साथै  शिक्षा जस्तो संवेदनशील क्षेत्रको जिम्मेवार तहबाट यस्ता  गैरजिम्मेवारपुर्ण अभिव्यक्ति आँफैमा अशोभनीय र भर्त्सनायोग्य भएको कुरा ठहर गर्दछौँ ।’

निजी विद्यालयको मिलामतोमा परीक्षा केन्द्र निर्धारण गरेको विषय मिडियामा आएको भन्दै मन्त्री भट्टराईले कर्मचारीलाई गुनासो नआउने गरी परीक्षा व्यवस्थित गर्न निर्देशन दिएकी थिइन् । 

एकाईका कर्मचारीलाई मन्त्री भट्टराईले स्थानीय र प्रदेशसँग समन्वय गरेर काम गर्न निर्देशन दिएकी छिन् । एकाइ एक्लै हिँडेर काँही नपुग्ने भन्दै भट्टराईले विगतको जस्तो शिक्षा कार्यालयको धङ्धङी छाड्न समेत आग्रह गरिन् । 

‘एकाइलाई हिजोको शिक्षा कार्यालयको रुपमा बुझ्नु भयो भने गलत हुन्छ’ उनले भनिन् । 

मधेस प्रदेशका मुख्य मन्त्री सतिश कुमार सिंहले पनि एसईई परीक्षाका सन्दर्भमा एकाइको व्यवहार ठिक नभएको भन्दै आपत्ति जनाएका थिए । 

पढ्नुहोस् : केन्द्र रहने विद्यालयकै प्रअ केन्द्राध्यक्ष हुँदा अनियमिता हुने भन्दै शिक्षा विकास तथा समन्वय एकाइ प्रमुखको मनसुवा पुरा हुन नदिने तर्क

आगामी बिहीबारबाट शुरु भई चैत १९ गतेसम्म देशभरका दुई हजार ७९ परीक्षा केन्द्रमा परीक्षा हुँदैछ । पाँच लाख १४ हजार ७१ विद्यार्थीले परीक्षा दिँदै छन् । बाल सुधार गृह र कारागारमा समेत गरी तीन वटा विशेष परीक्षा केन्द्र निर्धारण गरिएको परीक्षा बोर्डले जनाएको छ ।