काठमाडौँ–शिक्षा विज्ञान तथा प्रविधि मन्त्रालयले शिक्षकलाई मासिक तलब नदिँदा सामुदायिक विद्यालयको सिकाई कमजोर भएको निष्कर्ष निकालेको छ । 

मन्त्रालयले विद्यार्थीको सिकाई शिक्षकको तलबसँग जोडिएकोले यस वर्षको नीति तथा कार्यक्रम, शिक्षा नियमावलीमा व्यवस्था अनुसार नै मासिक तलब दिने व्यवस्था गरिदिन अर्को निर्णय गरेको हो । 

शिक्षा मन्त्री विद्या भट्टराईले सोमबार शिक्षकलाई मासिक तलब भत्ता दिने व्यवस्था मिलाइदिन संघीय मामिला तथा स्थानीय प्रशासन मन्त्रालयलाई अनुरोध गर्ने निर्णय गरेकी हुन् । शिक्षा नियमावलीको नियम १०१  अनुसार शिक्षकलाई मासिक तलब तलब दिने व्यवस्था छ । ‘शिक्षकलाई मासिक तलब दिन संघीय मामिला मन्त्रालय मार्फत स्थानीय तहलाई अनुरोध गरिएको छ,’मन्त्री भट्टराईले भनिन्,‘मासिक तलब नदिँदा सामुदायिक विद्यालयको सिकाइमा प्रभावित हुन्छ । यस विषयमा मन्त्रालय गम्भीर र संवेनसिल छ ।’ 

शिक्षकले मासिक तलब नपाएको समाचार, सामाजिक सञ्जालमा आएकोले मन्त्रालयले पुनः अनुरोध गरेको मन्त्री भट्टराईले बताइन । शिक्षा मन्त्रालयले संघीय मामिला मार्फत ७५३ पालिकालाई शिक्षकको मासिक तलब दिन परिपत्र र निर्देशन दिन पत्राचार गरेको भट्टराईले बताइन । उनले भनिन,‘संघीय सरकारले मासिक तलब दिन  बजेट विनियोजन गरिसकेको छ । बजेटमा र नीति तथा कार्यक्रममा उल्लेख भएकोले मासिक दिने व्यवस्था दिन फेरी अनुरोध गर्दछु । तपाईँहरूलाई केही समस्या भएमा सम्पर्क गर्न अनुरोध गर्दछु ।’