काठमाडौँ– शिक्षा विज्ञान तथा प्रविधि मन्त्री विद्या भट्टराईले विद्यालय शिक्षा विधेयकको छलफल तिहार पछि हुने बताएकी छिन् । अघिल्लो वर्ष भदौमा संसद्मा दर्ता भएको विधेयक एक वर्षमा संशोधनकर्तासँग छलफल सकिएको छ । 

सरकारले ०८० भदौ २७ मा संसद्मा दर्ता गरेको विधेयकमा एक सय ५४ जना सांसदले संशोधन हालेका थिए । विधेयक माथि संशोधन हाल्ने मध्ये ४० जना सांसद अनुपस्थित भए पछि प्रतिनिधिसभा शिक्षा, स्वास्थ्य तथा सूचना प्रविधि समितिले विधेयक छलफल टुङ्ग्याएको हो । छलफलमा सहभागी सांसदहरूले सरकार र शिक्षक महासंघ बिच भएको सम्झौता अनुसार नै शिक्षा ऐन बनाउनु पर्ने बताएका छन् । दफावार छलफल टुङ्गो नलगाएसम्म संशोधनकर्तासँगको छलफलको खासै अर्थ हुँदैन । 

विधेयकमा धेरै संशोधन भएकोले छलफलमा समय लागेको मन्त्री भट्टराईले बताएकी हुन् । दसैँ तिहारको बिचमा विधेयकको छलफल कसरी अघि बढाउने भन्ने छलफल गरेर तिहारपछि निष्कर्षमा लैजाने गरी अघि बढ्न लागेको उनले बताएकी हुन् । ‘संशोधन धेरै भएकोले अलमल जस्तो भयो । अब समिति र मन्त्रालय एउटा निष्कर्षमा पुगेका छौ । संशोधनकर्तासँगको छलफल सकिएको छ,’ एमाले निकट निजामती कर्मचारी संगठन शिक्षा मन्त्रालयको विभागीय कार्य समितिले आयोजना गरेको शुभकामना कार्यक्रममा मन्त्री भट्टराईले भनिन,‘अब विधेयक कसरी अघि बढाउने भन्ने बाटो पहिल्याएका छौ । समितिले देखाएको सहज वातावरणले समिति र मन्त्रालय बिच विश्वासको वातावरण बनेको छ ।’ 

विधेयक माथि संशोधन हाल्ने संशोधनकर्तासँगको अन्तिम छलफल असोज ४ सकिएको हो । प्रदेश स्तरमा सुझाव संकलन गरेर दफावार छलफल सुरु गर्ने कि सिधै दफावार प्रवेश गर्ने भन्ने प्रतिनिधिसभाको शिक्षा स्वास्थ्य तथा सूचना प्रविधि समिति अन्योलमा रहेको छ । मन्त्री भट्टराईले निजामती विधेयक र शिक्षा विधेयक पारित गरेपछि सरकारप्रति हुने गुनासो हल हुने बताइन । 

उच्च शिक्षा विधेयक र प्राविधिक शिक्षा सम्बन्धी विधेयक भने व्यापक छलफल गरेर मात्रै अघि बढाउने उनले बताइन । विधेयक अघि बढाउँदा सडक आन्दोलन गर्ने भन्दा पनि सबैले स्वीकार गर्ने गरी संसद्मा लैजाने उनले बताइन । ‘उच्च शिक्षाको बारेमा काठमाडौँ विश्वविद्यालय, त्रिवि, मदन भण्डारी विश्वविद्यालय बिच मत भिन्नता छन् । मत ऐक्यता भएपछि मात्रै यो विधेयक अघि बढाउँछौ,’मन्त्री भट्टराईले भनिन् । 

शिक्षाका कर्मचारी सरुवामा 'त्याग'

कर्मचारी सरुवामा विधि बसाल्न त्याग गरेर योगदान दिएको भन्दै शिक्षा मन्त्री भट्टराईले पार्टी निकट कर्मचारीलाई धन्यबाद् दिएकी छिन् । 

कर्मचारी सरुवामा विधि बसाल्न आफ्नो पार्टी निकटका कर्मचारीले सहयोग गरेको भन्दै उनले प्रशंसा गरेकी हुन् । ‘सरुवामा तपाईँहरूले त्याग गर्नु भयो । विधि बसाल्न सुझाव दिनु भयो । यहाँहरूले सिस्टम बनाउन भूमिका खेल्नु भएको । तपाईँहरूले जुन योगदान दिनु भयो सम्झनेछु । राम्रो कामको सुरुवात आफैबाट पर्नुपर्छ,’उनले भनिन् । 

मन्त्रालयले एकसाता अघि २१८ कर्मचारीको सरुवा गरेको थियो । १५ वर्ष भन्दा एउटै कार्यालयमा रहेका कर्मचारीलाई पनि मन्त्रालयले अन्यत्र सरुवा गरेको छ । मन्त्रीले सरुवालाई विधि बसाल्न प्रयास गरेको दाबी गरे पनि केही कर्मचारीले भने शिक्षा मन्त्रालयले आफ्नो क्षेत्राधिकार मिचेर सरुवा गरेको भन्दै विरोध गरेका छन् । सरुवा चित्त नबुझाउने कर्मचारीले मन्त्री र निजी सचिवको नातेदार, सत्ता निकटका कर्मचारीलाई १८ वर्षसम्म एउटै कार्यालयमा रहँदा पनि सरुवा नगरेको आरोप लगाएका छन् । ती कर्मचारीले सरुवा गर्दा अन्तर मन्त्रालयका कर्मचारी गरेर विधि भत्काएको भन्दै मन्त्रालय नेतृत्वको विरोध गरेका छन् । असन्तुष्ट एक कर्मचारीले भने,‘अन्तर मन्त्रालयको सरुवा सामान्य प्रशासन मन्त्रालयबाट मात्र गर्ने गरी निजामती सेवा ऐनमा व्यवस्था भएता पनि शिक्षा मन्त्रालयले अधिकार क्षेत्रभन्दा बाहिर गएको छ । रक्षा मन्त्रालयको सरुवा स्थानीय तहमा गरिएको छ, शिक्षा मन्त्रालयका कर्मचारीको सरुवा सूचना तथा सञ्चार मन्त्रालयमा गरिएको छ भने, बन तथा वातावरण मन्त्रालयका कर्मचारीको सरुवा शिक्षा मन्त्रालयमा गरिएको छ ।’ 

सरुवामा यसरी असन्तुष्टि जनाउने कर्मचारी भए पनि मन्त्री भट्टराईले भने विधि बसाल्न आफूले गरेको प्रयास सफल भएको बताइकी हुन् ।