भक्तपुर–सरकारले ०७७ मा साक्षर नेपाल घोषणा गर्ने भने पनि अझै दुई वटा प्रदेशको एक सय ५३ पालिका  साक्षर घोषणा हुन बाँकी रहेको छ । 

नीति तथा कार्यक्रम २०७७ मा तत्कालीन राष्ट्रपति विद्यादेवी भण्डारीले ०७७/७८ मा साक्षर नेपाल घोषणा गर्ने बताएकी थिइन । ०६५/०६६ देखि मुलुकलाई साक्षर नेपाल घोषणा गर्ने भन्दै सरकारले साक्षर नेपाल अभियान चलाएको थियो । ०७१ देखि साक्षर जिल्ला घोषणा सुरुवात भएको थियो । 

शिक्षा विकास तथा मानव स्रोत विकास केन्द्रका अनुसार अब मधेस र कर्णाली प्रदेश साक्षर घोषणा हुन बाँकी छ । केन्द्रका निर्देशक निलकण्ठ ढकालका अनुसार सप्तरी, सिराहा, धनुषा, महोत्तरी, सर्लाही, रौतहट, बारा, पर्सा साक्षर जिल्ला घोषणा हुन नसकेको हो । 

कर्णाली प्रदेशको मुगु, जुम्ला, हुम्ला, कालिकोट, डोल्पा साक्षर जिल्ला घोषणा गर्न बाकी रहेको ढकालले बताए ।   हुम्ला तत्काल साक्षर घोषणा गर्ने चरणमा रहेको उनले बताए ।  मधेस प्रदेशको एक सय ३० र कणालीको २३ स्थानीय तह साक्षर हुन बाँकी छ । साक्षर हुन बाँकी पालिकालाई संघले यस वर्ष अनुदान पठाइसकेको छ । केन्द्रका अनुसार नगरपालिकामा चार लाख र गाउँपालिकालाई तीन लाख रुपैयाँ अनुदान पठाएको हो । यो अनुदान निरक्षरलाई साक्षर गराउने ९ र १० कक्षाका विद्यार्थी, शिक्षकका लागि सहयोग प्रदान गर्न सकिने ढकालले बताए । 

२०६५ र २०६९ सालमा राष्ट्रिय साक्षरता अभियान सञ्चालन  गरेर २०७२ मा सबै जिल्लामा सघन साक्षरता कार्यक्रम सञ्चालन गरेको थियो । ६४ वटा जिल्ला र ३ वटा प्रदेश साक्षर घोषणा भएको उनले बर्ताए । १५–६० वर्ष उमेर समूहको साक्षरता प्रतिशत ८५ प्रतिशत पुगेको सरकारको तथ्याङक  छ । साक्षरताका १२ वटा सूचकहरूको आधारमा कुनै व्यक्ति साक्षर हो कि होइन भन्ने पहिचान गर्ने गरेको केन्द्रले जनाएको छ ।  राष्ट्रभाषा वा मातृभाषाका वर्ण र अक्षरको पढ्न र लेख्न जानेको हुनुपर्ने, नेपाली वा मातृभाषामा लेखिएका मूल्य सूची र बिल पढ्न सक्ने, आफ्नो र परिवारका सदस्यको नाम, उमेर लेख् र पढ्न सक्ने, मोबाइल र क्यालकुलेटरका अङ्क र अक्षर चिनेर प्रयोग गर्न ५० देखि ९ सम्मका अङ्क अक्षर लेख्न सक्ने, १ देखि १०० सम्म गणना गर्न सक्ने रहेका छन्। 

त्यस्तै लेनदेनका हरहिसाब राख्न सक्ने, सरल चित्र पोस्टर साइनबोर्ड र ट्राफिक सङ्केत पढ्न र बुझ्न सक्ने, सामुदायिक कार्यक्रममा आफ्नो विचारसहित सक्रिय सहभागिता देखाउन सक्ने, घडी हेरेर समय बताउन सक्ने, भित्ते पात्रो हेरी तिथि मिति बताउन सक्ने, बैङ्क भौचर भर्न र चेकको प्रयोग गर्न सक्ने भएपछि त्यो व्यक्ति साक्षर मानिने केन्द्रको सूचक छन्।

अन्तराष्ट्रिय साक्षरता दिवस आइतबार मनाउदैछ  । केन्द्रले साक्षरता दिवसको अवसरमा सानोठिमी स्थित केन्द्र परिसरमा शुक्रबार फलफूलको  बिरुवा रोपेको छ ।