पोखरा - सोमबार विहान रामदीमा भएको एलपी देवकोटा मेमोरियल स्कुल बस दुर्घटनामा दुई जनाको निधन भएको छ । दुर्घटनामा पोखरा १७ स्थित उक्त स्कुलका छात्र पाँच बर्षीय प्रिन्स विक र स्कुल बसमा सहयोगीका रुपमा कार्यरत उनकी आमा ३३ बर्षीया आरती विकको निधन भएको प्रहरीले जनाएको छ । 

उक्त घटनाको बारेमा सत्य तथ्य बुझि प्रतिवेदन पेश गर्न  महानगरपालिकाले पाँच सदस्यीय छानबिन समिति गठन गरेको छ । शिक्षा निर्देशक हेमप्रसाद आचार्य संयोजकत्वको उक्त समितिमा उपसचिव कृष्णप्रसाद तिवारी, नगर प्रहरी निरिक्षक पुरुषोत्तम थापा, मेकानिकल ईञ्जिनियर सरोज चालिसे सदस्य छन् । समितिको सदस्य सचिवमा शिक्षा अधिकृत रामप्रसाद तिवारीलाई तोकिएको छ ।  

ग १ क ६२१९ को उक्त बस दुर्घटनामा एलपी देवकोटा स्कुलका २२ र सामुदायिक विद्यालय छोरेपाटन माविका सात जना बालबालिका घाईते भएको प्रारम्भिक विवरण संकलन गरिएको महानगर शिक्षा शाखाका एक कर्मचारीले जानकारी दिए । निजी विद्यालयको बसका सामुदायिक विद्यालयका बालबालिका कसरी चढे भन्ने बारेमा पनि समितिले अध्ययन गर्ने एक सदस्यले बताए ।   

समितिलाई दुर्घटना हुनुको कारण, बसमा रहेका विद्यार्थी संख्या र राख्न पाउने संख्या, सवारी साधनको प्राविधिक अवस्था एवं  चालकको अवस्था लगायतका विषयमा अध्ययन गर्न कार्यादेश दिईएको छ । समितिलाई सात दिन भित्र प्रतिवेदन पेश गर्न भनिएको छ  । 

गण्डकी मेडिकल कलेजमा उपचार कै क्रममा दुबै जनाको  निधन भएको हो । दुर्घटनामा घाइतेहरुको गण्डकी मेडिकल कलेज, मणिपाल र पोखरा स्वास्थ्य विज्ञान प्रतिष्ठानमा उपचार भैरहेको छ ।  सोमबार बिहान विद्यार्थी लिएर आउने क्रममा बस दुर्घटना भएको हो । 

दुर्घटना पछि विद्यालयले मृतकहरु प्रति श्रद्धाञ्जली र परिवारमा समवेदना प्रकट गर्दै घाईतेहरुको शिघ्र स्वास्थ्य लाभको कामना गरेको छ । दुर्घटना पछि उद्धारमा सहयोग गर्नेहरु प्रति आभार व्यक्त गर्दै विद्यालयले संयमता अपनाउन आग्रह गरेको छ ।  विद्यालयले एक सूचना जारी गर्दै अर्को सूचना नभए सम्मका लागि विद्यालय बन्द हुने समेत जनाएको छ । 

फोटो : News Daily Nepal को फेसबुक पेजमा राखिएको भिडियोबाट