मंगलबार, ११ असार २०८१
मोरङ - सुन्दरहरैँचा नगरपालिकाको सुकुना माध्यमिक विद्यालयले विद्यार्थी चाप बढेपछि निजी विद्यालयको गाडी भाडामा लिएर विद्यार्थीलाई यातायात सुविधाको व्यवस्था गरेको छ । विद्यालयको आफ्नै ३ वटा गाडी भए पनि विद्यार्थीको चाप बढेसँगै अपुग भए पछि निजी विद्यालयका गाडी भाडामा लिएर विद्यार्थीलाई सवारीको व्यवस्थापन गर्नु परेको प्रधानाध्यापक हिक्मतबहादुर बस्नेतले बताए ।
चार हजार भन्दा बढी विद्यार्थी रहेको सुकुनामा अध्ययन गर्ने अधिकांश विद्यार्थीले विद्यालयको गाडी प्रयोग गर्छन् । विद्यार्थी चाप बढेकै कारण दुई सिफ्टमा पढाई हुन्छ । बिहानको सिफ्टको पढाई ६ देखि ११ बजेसम्म हुन्छ भने दिउँसोको सिफ्ट ११ देखि सुरु हुन्छ । अंग्रेजी माध्यमको ९ र १० को पढाई बिहानै हुन्छ ।
निजी विद्यालयको कक्षा १० बजे सुरु हुन्छ । आफ्नो विद्यार्थी विद्यालयमा ल्याए पछि खाली रहेको समयमा नजिकै रहेको सुकुना माध्यमिक विद्यालयका विद्यार्थी ओसार्न ती गाडी प्रयोग हुन्छन् ।
‘विद्यालयमा त्यतिकै बस्ने समयमा हामीले निजी विद्यालयको गाडी भाडामा लिएर चलाएका हौँ’ बस्नेतले भने ।
चार वटा निजी विद्यालयको ५ वटा गाडी भाडामा लिएर यातायातको सुविधा दिइरहेको प्रधानाध्यपक बस्नेतले बताए । आफ्नो गाडी गुडाउनु भन्दा निजी विद्यालयको भाडामा लिएर सञ्चालन गर्नु फाइदा हुने उनले बताए ।
‘दुरीको र मासिक कति ट्रिप गर्यो त्यसको आधारमा भुक्तानी दिने गरेका छौँ’ उनले भने ।
निजी विद्यालयको गाडीले बिहान आफ्नो विद्यार्थी ल्याएपछि सुकुनाको विद्यार्थी लिन जाने गरेको छ । निजी विद्यालय बेलुका ४ बजे छुट्टी भएर आफ्नो विद्यार्थी छाडेपछि ती गाडीले सुकुनाको विद्यार्थी ओसार्छन् ।
‘निजी र सामुदायिकको सहकार्यको राम्रो अभ्यास हामीले गरिरहेका छौँ’ बस्नेतले भने ।
विद्यालयमा कक्षा १० मा मात्रै सबै भन्दा बढी ५ सय ९३ जना विद्यार्थी अध्ययनरत छन् । अघिल्लो वर्ष मोरङमा बच्चा चोरीको घटना भए पछि सामुदायिक विद्यालयमा पढ्ने विद्यार्थीलाई पनि अभिभावकले गाडीमा चढाउने क्रम बढेको छ ।
प्रतिक्रिया