काठमाडौँ– त्रिभुवन विश्वविद्यालयको २० औं उपकुलपतिमा प्रा.डा. केशरजंग बराल नियुक्त भएका छन् । कुलपति एवं प्रधानमन्त्री पुष्पकमल दाहालको लामो कसरत पछि बराललाई नियुक्त गरिएको हो । बराल पोखरा विश्वविद्यालयका पूर्व उपकुलपति हुन् । 

विश्वविद्यालयको उपकुलपति छनोट समितिले आइतबार पहिलो नम्बरमा प्रा.डा. चित्रबहादुर बुढाथोकी, दोस्रोमा बराल र तेस्रो नम्बरमा प्रा.डा. टंकनाथ धमलाको नाम सिफारिस गरेको थियो ।  

दाहालले यी तीन मध्ये कसलाई बनाउने भन्ने निर्णय गर्न ५ दिन लगाएका हुन् । बुढाथोकी र बराल दुवै माओवादी समर्थित भए पनि कसलाई बनाउने भन्नेमा पार्टी भित्रै विवाद भएपछि नियुक्ति गर्न ढिलाइ भएको स्रोतले जनाएको छ । माओवादी नेता वर्षमान पुन, देवेन्द्र पौडेल बुढाथोकीलाई उपकुलपति बनाउनु पर्ने पक्षमा थिए भने प्रधानमन्त्री दाहाल बरालको पक्षमा थिए । 

उपकुलपति पदमा नियुक्तिको विज्ञापनमा ४३ जनाले आवेदन दिएका थिए। शिक्षा विज्ञान तथा प्रविधि मन्त्री अशोक कुमार राईको संयोजकत्वमा रहेको छनौट समितिमा शिक्षा सचिव सुरेश अधिकारी र त्रिवि सभा सदस्य उपप्राध्यापक चन्द्रकला घिमिरे सदस्य थिए । समितिले १४ जनाको सर्टलिष्ट निकालेको थियो । ४ वर्षीय कार्य योजना, अन्तर्वार्ताको आधारमा तीन जनाको नाम उपकुलपतिको लागि सिफारिस गरिएको थियो । 

धर्मकान्त बाँस्कोटाको कार्यकाल सकिएसँगै त्रिभुवन विश्वविद्यालयमा कात्तिक १७ गतेदेखि उपकुलपति पद खाली छ ।

प्रधानमन्त्री दाहालले त्रिभुवन विश्वविद्यालयको उपकुलपतिमा योग्य व्यक्ति छनौट गर्ने घोषणा गरे पनि मापदण्ड खुकुलो बनाइएको भन्दै विरोध भए पछि पहिलाको सूचना रद्द गरी फेरी प्रक्रिया सुरु गरिएको थियो ।