काठमाडौं - सत्ताधारी दल नेपाली कांग्रेसका महामन्त्री गगन थापाले नीतिगत रुपमा शिक्षा क्षेत्र सुधार गर्ने मौका आएको उल्लेख गर्दै यो मौकामा प्रतिनिधि सभाले गम्भिर भएर काम गर्नु पर्ने बताएका छन् । सोमबारबाट शुरु भएको प्रतिनिधि सभाको हिउँदे अधिवेशन अन्तरगत बुधबारको बैठकमा बोल्दै उनले मौका पाएको बेला सुधार नगर्ने हो भने पछि रोइकराई गर्नुको अर्थ नहुने बताएका छन् । प्रतिनिधि सभामा दर्ता भएको विद्यालय शिक्षा विधेयक र दर्ताको प्रकृयामा रहेको उच्च शिक्षा विधेयक तर्फ लक्षित गर्दै उनले यो समयलाई शिक्षा क्षेत्रको नीतिगत सुधारको लागि उपयोग गर्नु पर्ने बताएका हुन् । 

विद्यालय र उच्च शिक्षा विधेयक निर्माणको यो चरणलाई उनले शिक्षाको गुणस्तर सुुधार गर्ने गरी कानुन बनाउने मौका रहेको बताएका छन् । विद्यालय शिक्षा विधेयकमा स्वार्थ समूह हावी भएको बताउँदै उनले दलको स्वार्थ भन्दा पनि गुणस्तर सुधार गर्ने गरी बनाएमा नागरिकको मन जित्न सक्ने बताए । 

'त्रिभुवन विश्वविद्यालयको नेतृत्व रिक्त छ । अन्य विश्वविद्यालयको नेतृत्व रिक्त हुदैँ छ । मौका पाएको बेला सुधार गरेनौं भने रोइकराई गर्नुको अर्थ हुदैन' उनले भने 'विश्वविद्यालयको नेतृत्व भागवण्डा नगरी सक्षम नेतृत्व चयन गर्नुपर्छ । जुन व्यक्ति योग्य भनेर छान्छौँ नागरिकले टिप्पणी नगर्ने हुनुपर्छ । अहिले पनि चुक्यौ भने कुरा मात्रै हुन्छ ।' 

युवाहरु बाहिर पढ्न गएको कुराबाट चिकित्सा शिक्षा बर्वाद भयो, नेपालमा कडाई गरेपछि छिमेकी मुलुकको सिमा क्षेत्रमा दर्जनौ संस्था खुलेको र नेपालीहरु त्यहा पढ्न गएको जस्ता भ्रम आइरहेको बताउँदै उनले तथ्याङक हेर्दा ३ सय भन्दा बढी विद्यार्थी नर्सिङ पढ्न बाहिर नगएको बताए । 

'विद्यार्थी सीमा क्षेत्रका संस्थामा भन्दा पनि युरोप क्यानडा गएका हुन् । सबै पढ्न गएका होइनन् । जति पढ्न गएका छन्, विश्वविद्यायको  कारणले गएका छन् । विश्वविद्यालय सुधार गरेमा रोक्न सकिन्छ ।' उनले भने 'उच्च शिक्षाको विधेयक सरकारले सार्वजनिक गरेको छ । चाँडै संसदमा आउने छ । विदेश गयो भनेर हामी नै तथ्याङक पेश गरिरहेका हुन्छौं । त्यसैले यसलाई रोक्न संसदले काम गर्नु पर्ने हुन्छ । विश्वविद्यालयको स्वायत्तता, मौलिककता, विश्वबजार अनुकल जनशक्ति उत्पादन गर्ने कानुन बनाउनु छ ।' 

समस्या विश्वविद्यालयमा मात्रै नभएबो बताउँदै उनले विद्यालय शिक्षाको समस्यामा पनि ध्यान दिन जरुरी रहेको बताए । 

'विद्यालयको भवन बनेको छ तर, विद्यार्थी टिकाउन सकेको छैन । एक कक्षामा १ सय जना भर्ना भएकोमा १२ कक्षामा ३२ जना मात्रै पुग्छन् ।' उनले भने 'केटाकेटी पढिरहेका छन् तर, विज्ञान, अंग्रजी, गणित सिक्न सकेन भने अर्को पटक ट्रेन छुट्छ । फाउण्डेशन नभएको केटाकेटी भयो भने चाहेर पनि केही गर्नै सक्दैनौ ।' 

त्यसैले विद्यालय शिक्षा विधेयकमा गम्भिरता पूर्वक काम गर्नु पर्ने उनको भनाई छ । आरोप प्रत्यारोप गर्ने, राजनीतिक दलको आग्रहको रुपमा आफ्नो पोजिनको रुपमा प्रयोग गर्ने कि जनताको पक्षमा काम गर्ने हो ? यस तर्फ संसदमा प्रतिनिधित्व गर्ने सबै दल सचेत हुन जरुरी रहेको उनबो भनाई छ ।

संघीय विद्यालय शिक्षा र उच्च शिक्षा विधेयक संसदीय प्रकृया पार गरेर आउन समय लाग्न सक्ने भएकाले यही अवधिमा  स्थानीय तह र प्रदेशले काम गर्नु पर्ने उनले बताएका छन् ।