काठमाडौँ–शिक्षामन्त्री संयोजक रहेको त्रिभुवन विश्वविद्यालयको उपकुलपति छनौट समितिले उपकुलपति हुन आवश्यक मापदण्ड गोप्य राखेर सोमबार दोस्रो पटक विज्ञापन गरेको छ । उपकुलपति नियुक्तिका लागि नाम सिफारिस गर्न गठित छनोट तथा सिफारिस समितिको आइतबार बसेको बैठकले उपकुलपति छनोटसम्बन्धी कार्यविधि परिमार्जन गरेपछि दरखास्त आह्वान गर्ने निर्णय गरेको हो ।

पहिलो विज्ञापनमा विश्वविद्यालयको पदाधिकारीमा ३ वर्ष काम गरेको अनुभव हुनु पर्ने प्रावधान राखेर निकट व्यक्तिलाई उपकुलपति बनाउन लागेको भन्दै चौतर्फी विरोध भएको थियो । २० गतेको सूचनामा सार्वजनिक मापदण्डको विरोध भएपछि सोमबारको सूचनामा मापदण्ड के हुने भन्ने गोप्य राखिएको छ । उपकुलपति हुन आवश्यक पर्ने कागजपत्र शिक्षा विज्ञान तथा प्रविधि मन्त्रालयको वेभ साइटमा कार्यविधि रहेको सूचनामा उल्लेख छ ।

समितिले २० गते सार्वजनिक गरेको मापदण्डमा विवाद भएपछि अब कस्तो व्यक्तिलाई उपकुलपति बनाउने भन्ने नयाँ मापदण्ड  गोप्य राखिएको छ । समितिले जारी गरेको सूचनामा भनिएको छ,‘उपकुलपतिको पदमा दरखास्त दिन इच्छुक र योग्य व्यक्तिबाट दरखास्त आह्वान गरिएको छ । इच्छुक व्यक्तिले मन्त्रालयको वेभ साइटमा सूचनासँगै रहेको कार्यविधिमा उल्लेखित कागजात सहित दरखास्त पेस गर्न आव्हान गरिएको छ ।’ तर, वेभ साइटमा कार्यविधि राखिएको छैन । 

विश्वविद्यालयका कुलपति समेत रहेको प्रधानमन्त्री पुष्पकमल दाहालले मापदण्ड परिवर्तन गर्न निर्देशन दिएका थिए । कुलपतिको निर्देशनमा छनौट समितिले शनिवार पुरानो मापदण्ड रद्द गरिसकेको छ । 

धर्मकान्त बाँस्कोटाको कार्यकाल सकिएसँगै त्रिभुवन विश्वविद्यालयमा कात्तिक १७ गतेदेखि उपकुलपति पद खाली छ । 

शुरुमा सार्वजनिक सूचना :