काठमाडौँ–कक्षा ११ र १२ मा अध्यापन गराउने शिक्षकलाई लाइसेन्स नभएपछि स्थानीय तहले कुनै सुविधा नदिई जागिरबाट निकालेर आत्महत्या गर्ने अवस्थामा पुर्‍याएको भन्दै शिक्षकलाई बचाई दिन संघ सङ्गठनले आग्रह गरेका छन् । 

शिक्षक महासंघले समेत आफ्नो माग नउठाएको भन्दै ११ र १२ पढाउने शिक्षकका संघ संगठन सरकार र संसदीय समितिमा आफ्नो गुनासो सुनाउन पुग्न थालेका छन् । माध्यमिक शिक्षक युनियनका अध्यक्ष ज्ञान प्रसाद भट्टराइले सरकारले विषयगत दरबन्दीको व्यवस्था नगर्दा विज्ञापन पनि हुन नसकेको भन्दै तितो यथार्थ संसदीय समितिमा पोखे । ‘उच्च मावि तहको शिक्षकको कुनै दरबन्दीको किटान नभएकोले विज्ञापन नै निकाल्न सकेको छैन,’उनले भने,‘२ हजार दरबन्दी भनेको छ । दरबन्दी कायम गर्न किताब खानामा दर्ता भएको छैन । विषयगत कति शिक्षक भन्ने पनि छुटिएको छैन । मन्त्रालयले २ हजार दरबन्दी कुन विषयको हो भन्ने स्पष्ट पार्नु पर्ने हुन्छ ।’ 

सरकारले संसदमा पेस गरेको विधेयकको दफा ४४ को उपदफा ६ मा उच्च माविको शिक्षकको विषयलाई समेटिएको भए पनि पूर्ण नभएको उनले बताए । सरकार सँग असोज १२ मा गरेको सम्झौता अनुसार विधेयक टुङ्ग्याइदिन उनले समितिमा आग्रह गरे । ‘मन्त्रीज्यू समेत सहभागी भएर गरेको सम्झौता हो यसलाई अक्षरशः पालना होस,’उनले भने,‘सम्झौता गरेको छ भन्दैमा हामी प्रतिस्पर्धा नगरी सिधै स्थायी हुन चाहँदैनौ । हामी प्रतिस्पर्धा र परीक्षाबाट भाग्दैनौ । उमेर हद नलाग्ने गरी परीक्षाको व्यवस्था होस् । ३० वर्ष सेवा गरिसकेका शिक्षकलाई प्रतिस्पर्धा गराउँदा को सँग गराउने भन्ने चाहिँ पुन बिचार हुनु जरुरी छ ।’ 

२०७३ असार १५ भन्दा यता नियुक्ति भएका शिक्षकको लाइसेन्स नभएकोले उनीहरूलाई एक पटकको लागि भए पनि लाइसेन्सको व्यवस्था गर्ने गरी कानुन बन्नु पर्ने उनको सुझाव छ । 

माध्यमिक विद्यालय शिक्षक युनियनका  अध्यक्ष टिकाप्रसाद न्यौपानेले लाइसेन्स नभएका शिक्षकलाई स्थानीय तहले निकालिरहेको भन्दै विरोध गरे । ११ र १२ पढाउने शिक्षक तल्लो तह पढाउने भन्दा फरक भएकोले उनीहरूलाई सेवा सुविधा फरक हुनु पर्ने बताए । ‘८ देखि १० कक्षा पढाउने लाइसेन्स भएका शिक्षकले ११ र १२ पढाउन सक्दैनन्,’उनले भने,‘छुटै लाइसेन्सको व्यवस्था हुनुपर्छ । यसअघि लाइसेन्स लिन छुटेकालाई पनि पुनः लाइसेन्स खुलाउने व्यवस्था हुनु आवश्यक छ । लाइसेन्स नभएको भन्दै जागिरबाट निकाल्ने कार्य तत्काल बन्द गरिनु पर्छ ।’ लाइसेन्स नहुँदा स्थानीय तहले जागिरबाट निकालिरहेकोले तत्काल जागिर जोगाउने व्यवस्था गरिदिन उनले समिति र स्थानीय तहलाई आग्रह गरे । ‘पालिकालाई अनुरोध गर्दछु । जागिर जोगाइदिनुस् । जागिर जाने भएपछि केही साथीहरूले बन्दुक बोक्ने फोटो हालिरहेका छन् । केहीले आत्महत्या गर्ने अवस्थामा छन्,’उनले भने,‘जसलाई निकालिँदै छ उनीहलाई रित्ता हात घर नपठाइयोस् ।’ परीक्षा लिएर स्थायी गर्दा पनि पुरानोलाई सत प्रतिशत आन्तरिक गर्नु पर्ने बताए । परीक्षामा अनुत्तीर्ण हुनेलाई पनि सुविधा दिएर घर पठाउनु पर्ने उनको माग छ । ‘पुरानो साथीहरू भर्खर छिरेकासँग लड्न सक्दैनन् । परीक्षामा असफल हुनेलेलाई सुका मोहर दिएर बिदा गरौँ,’उनले भने । माध्यमिक विद्यालय शिक्षक युनियनको सह अध्यक्ष कल्पना पनेरुले ११ र १२ को दरबन्दी किनबेच भइरहेको आरोप लगाए । ‘प्लस टु राहत दरबन्दी किनबेच हुन्छ । ११ र १२ को शिक्षकको समस्या समाधान हुने गरी कानुन बनोस्,’उनले भनिन् ।