काठमाडौँ–संसद्को शिक्षा स्वास्थ्य तथा सूचना प्रविधि समितिले काठमाडौँ मेडिकल कलेज (केएमसी)का रेजिडेन्ट डाक्टरलाई निष्कासन गरेको विषयमा छानबिन गर्न शिक्षा विज्ञान तथा प्रविधि मन्त्रालयलाई निर्देशन दिएको छ । 
समितिको बिहीबारको बैठकमा राष्ट्रिय स्वतन्त्र पार्टीकी सांसद तोसिमा कार्कीले कार्कीले रेजिडेन्ट डाक्टरलाई निष्कासन गरेको विषयमा समितिले छलफल गर्नु पर्ने माग राखेकी थिइन । डा. विशद दाहाललाई केएमसीले कारबाही गरेको भन्दै समितिमा उजुरी समेत परेको समिति सभापति भानुभक्त जोशीले बताए । 

जोशीले मन्त्रालयका सचिव सुरेश अधिकारीलाई छानबिन गरेर तत्काल अप्रिय घटना हुन नदिन निर्देशन दिएका हुन् । ‘त्यो घटना के भएको हो तत्काल खोजी नीति गर्नु होला । तत्काल अप्रिय घटना हुन नदिने वातावरण बनाउनु होला,’समिति सभापति जोशीले भने,‘आवश्यक पर्‍यो भने समिति आफैले पनि अनुगमन गर्नेछ ।’ 
शिक्षा सचिव अधिकारीले गृह प्रशासनसँग समन्वय गरेर अप्रिय घटना हुन नदिने र रेजिडेन्ट चिकित्सकलाई गरेको कारबाहीको बारेमा काठमाडौँ विश्वविद्यालय र चिकित्सा शिक्षा आयोगसँग जानकारी लिने बताए । 
कलेज प्रशासनले कलेजको नीति विरुद्ध लागेको भन्दै डा. दाहाललाई एक महिनाका लागि निलम्बन गरेको घोषणा गरेको थियो ।
त्यसको विरोध भएपछि काठमाडौँ विश्वविद्यालयले निलम्बन स्थगन गर्दै ३ दिनभित्रमा कलेजसँग राय मागेको छ । कलेजले डाक्टर दाहाललाई प्रवेश निषेध गरेको छ । यसको  विरोधमा आवासीय चिकित्सकहरु आन्दोलनमा छन् । उनीहरू अस्पताल बाहिर धर्नामा बसेका छन् ।