काठमाडौ - बेलायती प्रधानमन्त्री ऋषि सुनकले ए–लेभल र हालै ल्याइएका टी–लेभल खारेज गर्ने योजना घोषणा गरेका छन् । कन्जरभेटिभ पार्टीको सम्मेलनमा उनले युवाहरूलाई नयाँ एडभान्स ब्रिटिश स्ट्यान्डर्ड (एबीएस) अध्ययन गर्न प्रस्ताव गरेका छन् । प्रस्तावित परिवर्तनहरूले बेलायतमा १६ बर्ष उमेर समूह पछिका विद्यार्थीको शिक्षामा ठूलो परिवर्तनलाई प्रतिनिधित्व गर्दछ । 

नेपालमा पनि बेलायती विश्वविद्यालयको सम्बन्धनमा ए–लेभलका कक्षाहरु सञ्चालनमा छन् । 

ए–लेभल र टी–लेभल जस्ता विद्यमान योग्यताहरूलाई एउटै योग्यताले प्रतिस्थापन गर्ने योजना रहेको सुनकले बताएका छन् । एबीएस अन्तर्गत, १६ –१९ बर्ष उमेर समूहका विद्यार्थीको शिक्षामा व्यापक परिवर्तनको संकेत देखिएको छ । अधिकांश विद्यार्थीले अंग्रेजी र गणितका केही सहित पाँचवटा फरक विषयहरू अध्ययन गर्नेछन् ।

धेरैजसो विद्यार्थीले तीनवटा खास विषयलाई प्रमुख विषयका रुपमा विस्तृतमा पढ्नु पर्ने छ । थप दुई विषयहरू विद्यार्थीले सामान्य विषयका रुपमा अध्ययन गर्नेछन् । यसले विद्यार्थीलाई रोजगारदाताहरूसँग जोड्ने अपेक्षा गरिएको छ । 
नयाँ योग्यताको ढाँचा निर्माण र कार्यान्वयन गर्न कम्तिमा एक दशक लाग्ने सम्भावना देखिएको बेलायती प्राज्ञिक पत्रिका theconversation.com  ले उल्लेख गरेको छ । यो परिवर्तनले पहिलेको शैक्षिक कठोरता र पछिल्लोले उपलब्ध गराएको पेशागत मापदण्डहरू संयोजन गर्ने लक्ष्य राखेको जनाईएको छ ।

'१६ बर्ष उमेर समूह पछिको शिक्षाको सुधार लामो समयदेखि बाँकी छ । हालको प्रणालीमा विद्यार्थीले उच्च शिक्षाको लागि शैक्षिक तयारीको रूपमा तीन वा चार ए–लेभलहरू छनौट गर्छन्, वा कार्यस्थलसँग जोडिएको अनावश्यक रूपमा विभाजित र सीमित विषय पढ्नु पर्छ' सुनकले भनेका छन् 'मेरो अनुसन्धान अनुसार एबीएसले प्राविधिक योग्यतालाई आफूले पाउनु पर्ने सम्मान दिने छ ।'

यो नयाँ योग्यता लागू गर्नु अघि दलीय सहमति जरुरी छ । उक्त पत्रिकाका अनुसार कन्जरभेटिभहरू अर्को आम चुनाव जित्न असफल भएमा यी योजनाहरू लागू हुने सम्भावनामा प्रश्न खडा गर्दछ । सरकार परिवर्तनले नयाँ योग्यता परिमार्जन वा पूर्ण रूपमा खारेज गर्ने योजनाहरू निम्त्याउन सक्ने पत्रिकाको विश्लेषण छ । नयाँ योग्यताले व्यावसायिक बाटो रोज्ने युवाहरूलाई कत्तिको फाइदा पुग्छ भन्ने प्रश्नहरू पनि बाँकी नै छन् । जीसीएसई पछि गणित वा अङ्ग्रेजीलाई छोडेर यी विषयहरूको अध्ययन आफूलाई उपयुक्त नभएको महसुस गर्ने युवाहरूले अब १८ वर्षसम्म दुवै परीक्षा लिनु पर्नेछ ।

नयाँ प्रस्तावको बारेमा धेरै विवरणहरू स्पष्ट हुन बाँकी छ । यद्यपि, कन्जरभेटिभ र लेबर पार्टीहरू दुवैले अहिले १६–१९ उमेर समूहको शिक्षामा ठूलो सुधारहरूको कुरा गरिरहेका छन् ।