काठमाडौं ११ पुस / शिक्षा, विज्ञान तथा प्रविधि मन्त्रालयलाई ६ विश्वविद्यालयमा उपकुलपतिको नियुक्ति गर्न हम्मे भएको छ। नेपाल समाचारपत्रमा ईश्वरराज ढकालले लेखेको खबर अनुसार
तीन महिनादेखि रिक्त उपकुलपतिहरूको नियुक्ति हुन नसकेपछि ती विश्वविद्यालयले महत्वपूर्ण निर्णय गर्न सकेका छैनन्।

विश्वविद्यालयका कुलपति एवं प्रधानमन्त्री केपी शर्मा ओलीले शिक्षामन्त्रीको संयोजकत्वमा गठित समितिले केही विश्वविद्यालयको उपकुलपति सिफारिस गरे पनि नियुक्ति गर्नुभएको छैन। तीन महिना बितिसक्दा पनि उपकुलपति जस्तो महत्वपूर्ण पद खाली हुनु गम्भीर विषय भएको छ।

उपकुलपति छनोट गर्न शिक्षा विज्ञान तथा प्रविधिमन्त्री गिरिराजमणि पोखरेलको अध्यक्षता, राष्ट्रिय योजना आयोगकी सदस्य (शिक्षा) उषा झा र विश्वविद्यालय अनुदान आयोगका अध्यक्षसहितको समितिले करिब दुई महिनाअघि मन्त्रालयले ६ विश्वविद्यालयका उपकुलपति र दुई विश्वविद्यालयको सेवा आयोगका अध्यक्षसहित सदस्य हुन इच्छुक विज्ञलाई विवरणसहितको आवेदन माग गरेको थियो।

तीमध्ये करिब ५० भन्दा बढीको नाम छनोट गरी तीन विश्वविद्यालयको तीन–तीन जनाको नाम सिफारिस गरिएको थियो। कमिटीले सुदूरपश्चिमाञ्चल विश्वविद्यालयमा भारती चन्द, रमेश भट्टराई र पूर्णबहादुर चन्दको नाम सिफारिस गरिएको छ।

मध्यपश्चिमाञ्चल विश्वविद्यालयमा केशरसिंह राना, नन्दकुमार सिंह र जनार्दन लामिछानेको नाम सिफारिस गरेको थियो। यस्तै, पोखरामा यादवप्रसाद लामिछाने, केशरजंग बराल र देवराज अधिकारीको नाम सिफारिस गरिएको छ।

अधिकारी विश्वविद्यालय अनुदान आयोगका सदस्य सचिव हुनुहुन्छ।प्रमुख प्रतिपक्षी नेपाली कांग्रेसलाई समेत समेटेर अघि बढ्ने भनिएतापनि यो सरकार एक्लैले नियुक्ति गर्ने तयारी गरेको छ।

छनौट समितिका संयोजक एवं विश्वविद्यालयका सहकुलपति गिरिराजमणि पोखरेलले भन्नुभयो– प्रक्रियामै छौं, केही दिनपछि निर्णय होला।

समितिले तीन जनाको नाम सिफारिस गर्ने र तीमध्ये एक जनालाई नियुक्ति गर्ने प्रचलन छ। स्रोतका अनुसार पार्टी मिलेता पनि छुट्ट्रै भागबण्डा खोजिरहेका तत्कालीन एमाले र माओवादीबीच सिफारिस नहुँदा समस्या भएको हो।