काठमाडौँ, १९ कात्तिक । एसिया प्यासिफिक युनिभर्सिटी (APU) मलेसियासँगको शैक्षिक सहकार्यमा लर्डबुद्ध एजुकेसन फाउन्डेसन क्याम्पसले नेपालमा स्नातक तहमा आगामी शैक्षिक शत्रदेखि सूचना प्रविधि र व्यवस्थापन विषयको अध्यापन सुरु गर्ने भएको छ । 

रोजगारमुखी शिक्षाको अवधारणालाई विशेष महत्वका साथ अवलम्बन गर्दै फाउन्डेसनले ती विषयको अध्यापन गर्न लागेको फाउन्डेसनका कार्यकारी निर्देशक पङ्कज जालानले जानकारी दिनुभयो । यसका लागि शिक्षा मन्त्रालयबाट समेत स्वीकृति लिइसकिएको छ । 

तीन वर्षे (६ सेमेस्टर) रहेको सो विषय नेपालमा अध्ययन गर्ने विद्यार्थीले दुई वर्ष नेपालमा र एक वर्ष मलेसियामा नै गएर अध्ययन गर्ने व्यवस्थासमेत रहेको छ । सन् १९९८ मा स्थापित फाउन्डेसनले अन्तर्राष्ट्रिय शैक्षिक संस्थासँग आबद्ध भई नेपालमा नै सस्तो र सुलभ तरिकाबाट सूचना प्रविधि, व्यापार व्यवस्थापन र जैविक प्रविधिजस्ता अत्याधुनिक विषयको अध्यापन गराउँदै आएको छ । 

(रासस)