काठमाडौं १ बैशाख/नवलपरासीमा नेपाल प्रहरीका पूर्व हवल्दार विष्णुप्रसाद पौडेलले कोदालोले हानेर एक जना शिक्षकको हत्या गरेका छन्।

प्रहरी पूर्व हवल्दार पौडेलले गैंडाकोट–२ गोपीधामस्थित आफ्नो घरमा डेरा गरी बस्दै आएका दुम्किबासका ३६ वर्षीय शिक्षक शेषकान्त रिमालको कोदालोले हानेर हत्या गरेको इलाका प्रहरी कार्यालय गैंडाकोटका प्रहरी निरीक्षक सुवास हमालले जानकारी दिनुभयो।
बिहीबार बिहान घरबेटी पौडेल र शिक्षक रिमालबीच सामान्य विवाद भएको बताइएको छ। विवादपछि पौडेलले शिक्षक रिमालमाथि कोदालोले प्रहार गरेका थिए। शिक्षक रिमालको हत्या लगत्तै प्रहरीले पौडेललाई पक्राउ गरिएको प्रहरी निरीक्षक हमालले जानकारी दिनुभयो।

रिमाल सरस्वती निकेतन बोडिङ स्कुल गैंडाकोटका अंग्रेजी विषयका शिक्षक रहेको प्रहरीले जनाएको छ। पौडेलले के कारणले शिक्षक रिमालको हत्या गरेका हुन् भन्नेबारे खुल्न सकेको छ। घटनाबारे थप अनुसन्धान भइरहेको प्रहरीले जनाएको छ।
अन्नपूर्णमा प्रकाशित खबर ।