आन्दोलित समाजशास्त्रका विद्यार्थीले गरे तोडफोड, विभागीय प्रमुख ओम गुरुङको राजीनामा माग

काठमाडौं ८ वैशाख / त्रिभुवन विश्वविद्यालय समाजशास्त्र केन्द्रीय विभागका विद्यार्थीले केन्द्रीय क्याम्पस कीर्तिपुरस्थित विभागको कार्यालयमा तोडफोड गरेका छन् ।

विभिन्न माग राखी समाजशास्त्रअन्तर्गतका विद्यार्थीले तालाबन्दी गरेका थिए । तर, आन्दोलनरत विद्यार्थीलाई विभागीय प्रमुखले अपमान गरेको भन्दै उनीहरू तोडफोडमा उत्रिएका हुन् ।

समाजशास्त्र विषयका तेस्रो सेमेस्टरका विद्यार्थी हरिप्रसाद आचार्यले समाजशास्त्र/मानवशास्त्रका विभागीय प्रमुखले समाजशास्त्रका विद्यार्थीलाई अपमान गरेपछि आक्रोशित विद्यार्थीले झ्याल तोडफोड गरेको बताए । आचार्यले भने, ‘विभागीय प्रमुखजस्तो जिम्मेवार व्यक्तिले सार्वजनिक ठाउँमा विद्यार्थी आन्दोलनले मेरो रौँ पनि हल्लिन्न भनेपछि विद्यार्थी आक्रोशित भएर तोडफोड गरेका हुन् ।’

पहिलो र दोस्रो सेमेस्टरमा दुई सेक्सनमा राखेर पढाइएका विद्यार्थीलाई तेस्रो सेमेस्टरमा एकै सेक्सनमा गाभिएपछि विद्यार्थी असन्तुष्ट भएका थिए । त्रिविको मानवशास्त्र तथा समाजशास्त्र विभागले विद्यार्थी संख्या घटेको र शिक्षक अपर्याप्त रहेको भन्दै दुई सेक्सनलाई गाभ्ने निर्णय लिएको थियो । विद्यार्थीले भने मानवशास्त्र र समाजशास्त्रका विद्यार्थीलाई काखा र पाखाको व्यवहार गरिएको भन्दै आन्दोलन गरिरहेका छन् ।

आइतबार एमए र एमफिलका विद्यार्थीले आन्दोलन अघि बढाउन हरिप्रसाद आचार्यको संयोजकत्वमा समिति बनाएका छन् ।

समितिले समाजशास्त्र विषयको छुट्टै केन्द्रीय विभाग बनाउनुपर्ने र अहिलेको समाजशास्त्र/मानवशास्त्रका विभागीय प्रमुख ओम गुरुङले राजीनाम दिनुपर्ने माग राखेका छन् । विभागीय प्रमुख गुरुङ मानवशास्त्रका प्राध्यापक भएकाले समाजशास्त्रलाई सिध्याउन खोजेको विद्यार्थीको आरोप छ ।

मानवशास्त्रमा जम्मा ३६ जना विद्यार्थीका लागि २० प्राध्यापक छन् । समाजशास्त्रमा पहिलो र तेस्रो सेमेस्टरमा गरी करिब सय विद्यार्थीका लागि केवल १० प्राध्यापक छन् । शिक्षक अभावकै कारण ऐच्छिक विषय छनोट गर्ने अवसरबाट वञ्चित भएको विद्यार्थीको गुनासो छ ।

नयाँ पत्रिका : http://www.enayapatrika.com/2015/04/3020