काठमाडौँ, १३ चैत । जिल्ला शिक्षा कार्यालय जुम्लाले शिक्षक नियुक्तिका लागि विज्ञापन गर्न रोक लगाएको खुलासा भएको छ ।  चन्दननाथ नगरपालिका–१२ मा अवस्थित भैरव माध्यमिक विद्यालयको माध्यमिक तहको विज्ञान सट्टा शिक्षक आवश्यकताका लागि दरखास्त आह्वान गर्न जिशिकाले रोक लगाएको प्रधानाध्यापक भीमबहादुर नेपालले जनाए । 

“शैक्षिक सत्रको सुरुवातमै विज्ञापन गर्न खोजेका हौँ तर जिशिकाले विस्थापित शिक्षकलाई नै स्थापित गर्ने भनेपछि विज्ञापन कार्यमा रोक लाग्यो,” प्रधानाध्यापक नेपालीले खुलासा गरे ।  विद्यालय सुरु भएको डेढ महिनासम्म पनि जिशिकाले शिक्षक पठाउन चासो नदिएपछि बाध्य भएर दबाब दिन कार्यालयमा आउनुपरेको उनको भनाइ छ । 

कक्षा १० मा अध्ययनरत छात्र सम्राट परियारले गाह्रो विषय विज्ञान र गणितको पढाइ अवरुद्ध हुनुमा जिशिका जुम्लाको ठूलो कमजोरी रहेको भन्दै आक्रोश पोखे ।  यता विद्यालय व्यवस्थापन समितिले आफ्नो अधिकारमाथि जिशिकाले हस्तक्षेप गरेको दोष लगाएको छ । 

शिक्षक पनि नपठाउने र अधिकार पनि प्रयोग गर्न नदिने जिशिकाको नीतिले विद्यालय सञ्चालनमा समस्या भएको अध्यक्ष अप्सरा न्यौपाने महतले बताए ।  जिल्ला शिक्षा अधिकारी कुलबहादुर फडेराले जिल्ला शिक्षा समितिको बैठक बसेर यो समस्यलाई यथाशीघ्र सुल्टाउने बचन दिए । 

बालबालिकाको पठनपाठनलाई प्राथमिकतामा राखेर शिक्षक व्यवस्थापनमा सहयोग पु¥याउने जिशिअ फडेराले विश्वास दिए ।  विद्यार्थीले भने यो महिनाको १६ गतेभित्र जिशिकाले शिक्षकको व्यवस्थापन नगरे आन्दोलनमा उत्रने चेतावनी दिएका छन् । सो विद्यालयमा कक्षा ८, ९ र १० गरेर जम्मा १७८ विद्यार्थीको पढाइ प्रभावित भइरहेको छ ।  

तत्कालीन विज्ञान शिक्षक रामसुरत चौधरी लोकसेवा आयोगमा नाम निकालेर नापतौल विभागमा गएपछि विद्यालयमा शिक्षक अभाव खट्केको जनाइएको छ । 

रासस