काठमाडौं - गए राती बसेको मन्त्रिपरिषद्को बैठकले दुई साता देखि सडक प्रर्दशन गर्दै आएका शिक्षकहरुलाई कार्यथलो फर्कन आह्वान गरेको छ । विद्यालय शिक्षा ऐन जारी गर्न माग गर्दै आएका शिक्षकलाई नयाँ शैक्षिक सत्र शुरु भएको र विद्यार्थी भर्ना अभियान चलाउनु पर्ने भएकाले विद्यार्थी अभिभावक प्रति संवेदनशील हुन सरकारले आह्वान गरेको हो । 

 मध्य राती सकिएको मन्त्रिपरिषद् बैठकले बैशाख १२ गते संसद बैठक बोलाउन राष्ट्रपति समक्ष सिफारिस गर्ने निर्णय पनि गरेको छ । नेपाल शिक्षक महासंघले तुरुन्त संसद बैठक आह्वान गर्ने, विशेष बैठक डाक्ने वा अध्यादेश ल्याएर ऐन जारी गर्नु पर्ने विकल्प दिएको थियो । सरकारले नियमित बैठक आह्वान गरेको हो । यो बैठकमा शिक्षा विधेयकलाई पारित गर्न सरकारको तर्फबाट आवश्यक समन्वय र सहजीकरण गर्ने निर्णय भएको शिक्षा मन्त्री विद्या भट्टराईलाई उदृत गर्दै प्रधानमन्त्रीको सचिवालयले जनाएको छ ।  

'नेपाल शिक्षक महासंघले उठाएका मागहरुको यथोचित सम्बोधन गर्ने सम्बन्धमा संवाद निरन्तर रहेको र अझै संवाद गर्न सरकार संवेदनशील र गम्भीर रहेको छ' भट्टराईलाई उदृत गर्दै सचिवालयले भनेको छ 'यथोचित मागको सम्बोधन गर्न सरकार तयार छ ।'  

गत चैत २० गते देखि सडक प्रर्दशनमा उत्रिउका शिक्षकहरुले २५ गतेबाट शैक्षिक हड्ताल आह्वान गरेका छन् । यसले गर्दा नयाँ शैक्षिक सत्रसँगै विद्यार्थी भर्नाको कार्यक्रम कक्षा १० का अन्तिम परीक्षाको कापी परीक्षण र ११ गतेबाट शुरु हुने कक्षा १२ को परीक्षामा समेत असहयोग गर्ने महासंघले निर्णय गरिसकेको छ । 

मन्त्रीपरिषद्को बैठकका निर्णय बारेमा औपचारिक जानकारी प्राप्त भएपछि धारणा सार्वजनिक गर्ने महासंघले तयारी गरेको एक नेताले जानकारी दिए ।