काठमाडौं - फरक राजनीतिक विचार बोक्नेहरुले एकैदिन  छुट्टा छुट्टै प्रदर्शन गर्ने भए पछि काठमाडौं उपत्यकाका भित्रि शहरी क्षेत्रका विद्यालयहरुमा अध्ययनरत बालबालिकाहरुमा त्रासको वातावरण बनेको छ । गणतन्त्र पक्षधर र राजावादीले शुक्रबारका लागि तय गरेको  प्रदर्शनका कारण यस्तो अवस्था उत्पन्न भएको हो । 

यतिखेर अधिकाँश विद्यालयहरुमा अन्तिम परीक्षा चलिरहेको छ । कक्षा १० को अन्तिम परीक्षा एसईई पनि जारी छ । यस्तो बेला दुई थरी फरक विचार बोक्ने समूह सडकमा उत्रिएपछि अभिभावक र बालबालिकामा त्रास उत्पन्न भएको छ । 

कतिपय विद्यालयहरुले भने अभिभावकहरुलाई विहानै म्यासेज गरेर विद्यालय बन्दको खबर पठाएका छन् । बालबालिकालाई प्रत्यक्ष असर पार्ने यस्ता घटनाले  बालबालिकालाई दुरगामी मनोवैज्ञानिक असर पार्ने अभिभावक महासंघका अध्यक्ष सुप्रभात भण्डारी बताउँछन् । 

'दुई थरीले एकै दिन प्रर्दशन गर्ने भए पछि अभिभावक र विद्यार्थीमा चिन्ता र त्रासले घर गरेको छ, स्कुल गएपछि सकुशल फर्कलान् कि नफर्कलान् भन्ने अभिभावकलाई पीर पारेको छ' उनले भने 'आफूले गर्ने गतिविधिका कारण बालबालिका माथि पार्ने यस्ता दुस्प्रभावका बारेमा राजनीति गर्छौं भन्नेहरु कहिल्यै गम्भिर नबन्नु हाम्रो दुर्भाग्य नै भयो ।' 

उत्यकाका विभिन्न ठाउँहरुबाट नारा जुलुस सहित सभा गर्ने दुई थरीकै तयारी छ । यसका कारण उत्पन्न हुने ट्राफिक  समस्याका कारण टाढाबाट विद्यालय आउने बालबालिका झन् जोखिममा पर्ने देखिएको छ । 

अन्तिम वार्षिक परीक्षा चलिरहेका कारण पनि औपचारिक रुपमा विद्यालय बन्दको निर्णय नगरिएको निजी विद्यालय सञ्चालकहरुको संस्था प्याब्सनका महासचिव आरबी कटुवालले बताए । 

'अधिकाँश विद्यालयमा अहिले अन्तिम परीक्षा चलिरहेको छ, प्याब्सनले विद्यालय बन्दको औपचारिक निर्णय गरेको छैन' उनले भने 'कतिपय विद्यालयहरुले गाडी चलाउन कठिन पर्ने भएकाले अभिभावकहरुले नै बालबालिकालाई सुरक्षित रुपमा विद्यालय ल्याउन आग्रह गरेको अनौपचारिक खबर थाहा पाएको छौं ।'