शुक्रबार, २८ मंसिर २०८१
भक्तपुर - कक्षा १० को अन्तिम परीक्षा (एसईई) मा अघिल्लो वर्ष एनजी आएको विषयको मात्रै विद्यार्थीले परीक्षा दिन पाउने भएका छन् । लेटर ग्रेडिङ निर्देशिका २०७८ संशोधन गरी यस वर्षदेखि जुन विषयमा एनजी आएको हो त्यही विषयको मात्रै परीक्षा दिन पाउने प्रावधानको व्यवस्था गर्न लागिएको हो । कक्षा आठ, १०, १२ मा सबै विषयमा सैद्धान्तिकमा डी र प्रयोगात्मकमा सी ल्याउनै पर्ने हुन्छ । हरेक विषयमा यो ग्रेड प्राप्त नगरेका विद्यार्थीलाई प्रमाणपत्र समेत नदिने व्यवस्था छ ।
संशोधन गरिएको निर्देशिका अनुसार नियमित वा ग्रेड वृद्धि परीक्षामा कम्तीमा डी ल्याउन नल्याए पछि एनजी आएका विद्यार्थीले एनजी आएको विषयको मात्रै परीक्षा दिन पाउँछन् । ‘नियमत र मौका परीक्षा दिँदा पनि एनजी आएका विद्यार्थीले जति विषयमा एनजी आएको हो त्यसको मात्रै परीक्षा दिन पाउँछन’ परीक्षा नियन्त्रक नन्दलाल पौडेलले भने ।
यो अवसर तीन वर्षसम्म पाउने उनले बताए ।
राष्ट्रिय परीक्षा बोर्डले केही दिनमै परीक्षा फारम खुलाउने तयारी गरेको छ । परीक्षा फारम निःशुल्क गर्ने विषयमा विवाद मिल्न सकेको छैन । शिक्षा मन्त्री विद्या भट्टराई परीक्षा र रजिष्ट्रेशन फारम निःशुल्क हुनु पर्ने पक्षमा छन् भने बोर्डका पदाधिकारी शुल्क नलिई परीक्षा सञ्चालन गर्नै नसक्ने अडानमा छन् । बोर्डको बार्षिक कार्यतालिका अनुसार यस बर्ष कक्षा १० को अन्तिम परीक्षा चैत सात गते देखि हुँदैछ ।
प्रतिक्रिया