काठमाडौँ–शिक्षा, विज्ञान तथा प्रविधि मन्त्रालयले बाढी पहिरोले शिक्षा क्षेत्रमा परेको समस्याको जानकारी सिधै मन्त्रालयका प्रवक्तालाई गराउन आग्रह गरेको छ । 

मन्त्रालयले शनिवार साँझ विज्ञप्ति जारी गरेर विपद्बाट शैक्षिक क्षेत्रमा परेको समस्या मन्त्रालयमा जानकारी गराउन आग्रह गरेको हो । ‘विपद् बाट  सिर्जित कुनै पनि प्रकारका समस्याका बारेमा मन्त्रालयको प्रवक्ता र सूचना अधिकारीलाई 

जानकारी गराइदिनु हुन सम्बद्ध सबैमा अनुरोध छ,’विज्ञप्तिमा उल्लेख छ । मन्त्रालयले सहसचिव एवम् प्रवक्ता लक्ष्मीप्रसाद भट्टराईलाई ९८५११६९५६० र सूचना अधिकारी नारायणप्रसाद पोखरेललाई ९८५१०१३९०८ मा शिक्षा क्षेत्रमा विपतले पारेको समस्या जानकारी गराउन आग्रह गरेको हो ।

मन्त्रालयले  विभागीय कार्यालय, शिक्षा विकास तथा समन्वय इकाई, विश्वविद्यालयहरूको हकमा विश्वविद्यालय अनुदान आयोगले आवश्यक समन्वय गर्न निर्देशन दिएको छ । त्यस्तै विपद् व्यवस्थापन तथा तत्काल राहतमा सहयोग गर्न र भौतिक, शैक्षिक र मानवीय क्षतिको विवरण विश्वविद्यालय अनुदान आयोग र शिक्षा तथा मानव स्रोत विकास केन्द्रमार्फत मन्त्रालयमा यथाशीघ्र पठाउन अनुरोध पनि गरिएको छ ।