काठमाडौँ–राष्ट्रिय परीक्षा बोर्डले सार्वजनिक गरेको कक्षा १० को अन्तिम परीक्षा (एसईई) को नतिजा चित्त नबुझेर पुनर्योग गर्दा पाँच प्रतिशतको परिवर्तन भएको छ । 

बोर्डमा परेको १८ हजार ६ सय १२ जनाको पुनर्योगको लागि अनलाइन आवेदन परेकोमा ११ हजार तीन सय ३१ जनाको उत्तर पुस्तिका हरेर नतिजा समेत सार्वजनिक गरिसकेको शिक्षा मन्त्री विद्या भट्टराईले बताईन् ।

पुनर्योग गर्दा यसअघिको नतिजामा लापरबाही पाइएको सञ्चार माध्यममा समाचार आएपछि मन्त्रालयले बोर्डका पदाधिकारीसँग बैठक राखेको थियो । छलफलमा कमजोरी पहिचान गर्न निर्देशन दिइसकेको उनले बताईन् । पुनर्योगका लागि आवेदन दिएर उत्तर पुस्तिका हेर्दा ६ सय २१ जनाको नतिजा परिवर्तन भएको मन्त्री भट्टराईले बताईन् ।

पुनर्योगको लागि निवेदन दिएर उत्तर पुस्तिका हेर्दा ५.४८ प्रतिशतको नतिजा सुधार भएको पाइएको छ ।

‘चेकिङमा इरर छ । पोष्टिङ गर्दा, इण्ट्री गर्दा समस्या छ,’उनले भनिन् ‘पहिला पूरक परीक्षा सक्नु पर्नेछ । परीक्षा सकिए पछि बोर्डसँग बसेर कसको कमजोरीले यसरी विद्यार्थीको नतिजा लापरबाही भएको हो ? पत्ता लगाउन भनिसकेको छ । जे निष्कर्ष आउँछ । कारबाही गर्नु पर्ने हो कि के गर्नु पर्ने हो गर्छौँ ।’

एसईईको नतिजालाई मन्त्रालयले गम्भीर रूपमा लिएको उनले बताईन् । पुनर्योग गर्दा काठमाडौंको विश्व निकेतन माविमा चार जीपीए ल्याउने एक जना थपिएको प्रधानाध्यापक हेरम्बराज कडेलले बताए । सुरुमा ३ दशमलब ९५ जीपीए रहेको विभब ढकालको पुनर्योग गर्दा चार जीपीए आएको उनले बताए । यो संगै यो विद्यालयमा चार जीपीए ल्याउने विद्यार्थीको संख्या पाँच पुगेको छ ।