विहीबार, ०३ साउन २०८१
काठमाडौँ–काँग्रेस सांसद जीवन परियारले निजामती कर्मचारीको जस्तै शिक्षकको लागि पनि छटटै ऐनको खाँचो रहेको औँल्याएका छन् । विद्यालय शिक्षा विधेयकको संशोधकर्तासंगको छलफलमा परियारले यो विधेयकले शिक्षकको माग सम्बोधन हुन नसक्ने बताएका हुन् ।
निजामती कर्मचारी सरह बनाउनको लागि भए पनि शिक्षकको लागि छटटै कानुन आवश्यक रहेको उनले बताए । शिक्षक सम्बन्धी ऐन फरक हुनुपर्छ निजामती जस्तै शिक्षकको पनि हुनुपर्छ । ‘कर्मचारीको हुन्छ भने शिक्षकको किन छटटै ऐन हुँदैन ?,’उनले भने,‘शिक्षकको अलग कानुन बनाऔँ ।’
विद्यालय शिक्षा विधेयक संविधानको मर्म अनुसार नभएको उनको दाबी छ । शिक्षामन्त्रीले विधेयक पेस गरे पनि कर्मचारीले बनाएकोले संविधानको सबै धाराको मर्मत समेट्न नसकेको उनले बताए । ‘कर्मचारीहरूले संविधान पढ्नु भएको रहेछ,उनले भने । काँग्रेस महामन्त्री गगन थापा र उनले विधेयकको नाम नै फेर्नु पर्ने संशोधन हालेका छन् । उनीहरूले विद्यालय शिक्षा गुणस्तर तथा मापदण्ड निर्धारण सम्बन्धी ऐन बनाउनु पर्ने उनीहरूले संशोधन हालेका छन् । निजामती कर्मचारी र विद्यालय शिक्षा कर्मचारीको समान हैसियत हुने गरी विधेयक पारित गर्नु पर्ने उनले बताए । ‘विद्यालय कर्मचारीको हैसियत कम आँकिएको छ,’उनले भने,‘निजामतीको हैसियत जे छ विद्यालय कर्मचारीको पनि उही हुनु पर्छ । कार्यालय सहयोगी, लेखाको कर्मचारी चाहिँ कर्मचारी होइन ? शिक्षा मन्त्रालयका कर्मचारी चाहिँ कर्मचारी अनि विद्यालयका कर्मचारी चाहिँ कर्मचारी होइनन् ?’
त्यस्तै शिक्षकको उच्च सम्मान हुने गरी विधेयकमा सहमति खोज्नु पर्ने उनले बताए । निजामतीको भन्दा पनि शिक्षकको तलब आकर्षक हुनुपर्ने उनको माग छ । ‘जबसम्म शिक्षकको तलब आकर्षक हुँदैन तबसम्म गुणस्तर सुधार आउन सक्दैन,’उनले भने,‘आकर्षक तलबले मात्रै योग्य व्यक्ति शिक्षक हुन आउँछन् । अहिले त एसईईमा कमजोर विद्यार्थी मात्रै शिक्षा पढिरहेका छन् ।’ विद्यालय शिक्षा विधेयक एसईईमा एनजी आएका ५२ प्रतिशतलाई हेरेर बनाउनु पर्ने परियारले बताए ।
प्रतिक्रिया