काठमाडौँ– शिक्षामन्त्री सुमना श्रेष्ठले शिक्षामा हुने राजनीतिकरण विरुद्ध कडा रूपमा प्रस्तुत हुने संकेत गरेकी छन् । 

सत्तारुढ दल एमाले र माओवादीका नेताहरूले शिक्षकलाई राजनीतिक दलमा आबद्ध भएकै कारण कारबाही गर्ने नाममा त्रसित पारेको भन्दै मन्त्री श्रेष्ठको विरोध गरिरहेका छन् । मन्त्रीले सत्तारुढ दलका नेताले दिएको दबाबको प्रवाह नगरी अडान कायमै राखेर आफ्नो सास रहुन्जेल दलीयकरण विरुद्ध लडिरहने घोषणा गरेकी हुन् । पत्रकार सम्मेलनमा उनले भनिन,‘शिक्षामा दलीय राजनीतिकरण हुन नहुने विषयलाई अन्तिम सास रहेसम्म छाडदिन यो मेरो  एजेन्डा हो ।’ शिक्षामन्त्रीको पदभार सम्हाले पछि उनले शिक्षामा राजनीतिकरणको अन्त्य गर्ने घोषणा गरेकी थिइन ।

आफ्नो निर्णय कार्यान्वयन गर्न उनले विद्यालय तहका शिक्षकलाई राजनीतिमा लाग्न नपाइने कानुनी प्रावधान कार्यान्वयन गर्ने निर्णय गरिन । यो निर्णय अनुसार ८ सय २५ जना शिक्षकले राजनीतिक दलको सदस्यता परित्याग गरेको उनले बताइन । राजनीतिमा लागेका २० जना शिक्षकले शिक्षण पेसा नै परित्याग गरेर राजनीतिमा लागेको उनले बताइन । राजनीतिमा आबद्ध ४५ शिक्षकविरुद्ध उजुरी परेकोमा ४१ जनासँग स्पष्टीकरण सोधिएको उनले बताइन । यस मध्ये  ४ जनाले सफाइ पाएको मन्त्री श्रेष्ठले बताइन । निर्वाचन आयोगबाट राजनीतिमा सक्रिय शिक्षकको विवरण माग गरे पनि आउन बाँकी रहेको उनले बताइन ।

राजनीतिक दल सम्बन्धी ऐनमा शिक्षकले राजनीतिक दलको सदस्य बनाउन नहुने व्यवस्था छ । ऐन कार्यान्वयन गर्ने काम शिक्षा मन्त्रालयको मात्रै काम नभएको उनले बताइन । शिक्षा मन्त्रालयले काजमा रहेका शिक्षकलाई फिर्ता पठाउने निर्णयलाई मन्त्रीले आफ्नो प्रगति विवरणमा राखेकी छन्  । शिक्षकलाई स्थानीय तहको शिक्षा प्रमुख, अन्य काममा काजमा खटाउन रोक लगाउने उनले निर्णय गरेकी थिइन । मन्त्रालयको रेकर्डमा २ सय ९१ जना शिक्षक काजमा रहेको पाइए पनि ५४ जना शिक्षकको काज फिर्ता भएको मन्त्री श्रेष्ठले बताइन । काजमा रहेका मध्ये ५९ जनालाई स्पष्टीकरण सोधिएको उनले बताइन । 

शिक्षा मन्त्रीको सय दिनको प्रगतिमा शिक्षकलाई सेवा प्रवेशको तालिम, दरबन्दी मिलानको तयारी शिक्षक पोर्टलको व्यवस्था, संस्थागत विद्यालयको शिक्षक र कर्मचारीको पेसागत सुरक्षाको लागि पहल गरेको उल्लेख छ । त्यस्तै भूकम्प प्रभावित विद्यालयको बजेटको व्यवस्था, प्राध्यापक प्रारूप बनाइएको उनले बताइन ।

विद्यार्थीलाई राष्ट्रिय परिचयपत्र नम्बर उपलब्ध गराउने, पुस्तक पुनः प्रयोगको बारेमा नीति तथा कार्यक्रममा व्यवस्था भएको, करिअर काउन्सिल कार्यक्रमको सुरुवात भएको, समाजसँग पाठ्यक्रम कार्यक्रम गर्न लागेको मन्त्री श्रेष्ठले बताइन । विदेशी सम्बन्धनका कलेजको कार्यक्रमलाई व्यवस्थित गर्न पूर्व सचिवको नेतृत्वमा बनाएको छानबिन समितिले प्रतिवेदन दिइसकेकोले निर्देशिका संशोधनको बाटो अघि बढाउने उनले बताइन । 

यो पनि पढ्नुहोस् : शिक्षक सरुवा निर्देशिकाको बचाउमा शिक्षा मन्त्री !

खोज्ने सिष्टम सुधार्न, गर्ने अविश्वास !