काठमाडौँ–राष्ट्रिय परीक्षा बोर्डले कक्षा १० (एसइई) को नतिजा असार दोस्रो साता भित्र प्रकाशन गर्ने तयारी गरेको छ । उत्तर पुस्तिका परीक्षणको काम चार दिन भित्र सकिने भएकोले अब नम्बर इन्ट्री गर्न मात्रै बाँकी रहेको परीक्षा नियन्त्रक नन्दलाल पौडेलले बताए । 

चैत १५ देखि सुरु भएको परीक्षामा नियमित तर्फ ४ लाख ६७ हजार विद्यार्थीले परीक्षा दिएका छन् । त्यस्तै २१ हजार विद्यार्थी  ग्रेड वृद्धि परीक्षामा सहभागी भएका छन् । 

विद्यार्थीको उत्तर पुस्तिका ५२ वटा परीक्षण केन्द्रमा पठाइएकोमा ३१ वटामा परीक्षण सकिएर नम्बर समेत आइसकेको परीक्षा नियन्त्रक पौडेलले बताए । 

‘बाँकी केन्द्रमा पनि बढीमा चार दिन भित्र परीक्षणको काम सकिन्छ,’उनले भने ।

परीक्षण केन्द्रले पठाएको विद्यार्थीले प्राप्त गरेको नम्बर इन्ट्री गर्ने काम सुरु भइसकेको पौडेलले बताए ।

‘परीक्षण सकिएको केन्द्रबाट प्राप्त नम्बर इन्ट्री भइरहेको छ,’उनले भने ।

असार १४ गतेसम्म नतिजा प्रकाशन गर्ने र विद्यार्थीको ग्रेड सिट साउनको पहिलो साता भित्रै विद्यालयमा पठाउने योजनाको साथ काम भइरहेको कार्यालयले जनाएको छ । 

अघिल्लो वर्ष असार २४ मा नतिजा सार्वजनिक भएको थियो । अघिल्लो वर्ष भन्दा दुई साता अघि सार्वजनिक गर्ने गरी काम भइरहेको पौडेलले बताए ।  कार्यालयले यसपालि एसइईको नतिजा सैद्धान्तिक र प्रयोगात्मक फरक गरेर निकाल्दै छ । सैद्धान्तिक तर्फको ७५ अंकको परीक्षामा विद्यार्थीले अनिवार्य ३५ प्रतिशत अथार्त २७ अंक ल्याउनै पर्ने हुन्छ । विद्यार्थीले २७ अंक ल्याउन नसकेकोमा विद्यार्थीले पाउने ग्रेडसीटमा एनजी उल्लेख हुनेछ । यो भनेको विगतको श्रेणी छुट्टाएर गर्ने नतिजा फेल भए सरह हो ।