भक्तपुर–सूर्यविनायक नगरपालिकाको दधिकोट गाम्चामा रहेको अरनिको माध्यमिक विद्यालयमा भर्ना गर्न सीमित कोटा भए पनि विद्यार्थी चाप बढेपछि प्रवेश परीक्षा लिएर विद्यार्थी छनोट थालेको छ । 

आधारभूत र माध्यमिक तहको परीक्षामा उत्कृष्ट नतिजा आएपछि निजी विद्यालय छाडेर अरनिको माध्यमिक विद्यालयमा भर्ना हुने विद्यार्थीको संख्या बढेको प्रधानाध्यापक महेन्द्र श्रेष्ठले बताए । १ देखि ९ सम्म ७७ जना विद्यार्थी भर्ना कोटा भए पनि २ सय ३५ जनाले प्रवेश परीक्षा दिएको उनले बताए । निजी विद्यालयले आवश्यक प्रमाण उपलब्ध नगराएको कारण प्रवेश परीक्षामा सहभागी हुनेको संख्या अझ कम भएको उनले बताए । ‘प्रवेश परीक्षामा जन्म दर्ता, उनीहरूको ग्रेड सिटलाई अनिवार्य गरेका थियौ,’श्रेष्ठले भने,‘कतिपयले ल्याउन नसकेको कारणले फारम लगे पनि परीक्षा दिने कम भए ।’

सबैभन्दा बढी विद्यार्थी चाप कक्षा आठ र नौ मा रहेको उनले बताए । कक्षा आठमा १४ जनाको कोटा भए पनि प्रवेश परीक्षा ४५ जनाले दिएका छन् । कक्षा ९ मा आठ जना मात्रै भर्ना गर्न सकिने भए पनि ३६ जनाले प्रवेश परीक्षा दिएको उनले बताए । कक्षा चारमा भर्ना लिनै नसक्ने रहेको उनले बताए ।  परीक्षा दिनेमा सबैजसो निजी विद्यालय छाडेर आउने रहेको उनले बताए । 

प्रवेश परीक्षा दिने धेरै विद्यार्थी भएपछि भर्ना गरिदिन भन्दै भनसुन पनि उत्तिकै भइरहेको शिक्षकहरु बताउँछन् । पछिल्लो वर्ष निजी विद्यालयबाट सामुदायिकमा आउनेको संख्या बढेको शिक्षकहरू बताउँछन् । सामुदायिक विद्यालय समुदायको हेलामा परेपछि शिक्षकहरूले मिहेनत गर्न थालेका छन् । विद्यार्थी तान्न अङ्ग्रेजी माध्यमबाट पढाई, निःशुल्क अध्ययन गर्न पाउने भएपछि निजी विद्यालय छाडेर सामुदायिक तर्फ अभिभावक आकर्षित हुन थालेका हुन् ।