काठमाडौं -  शिक्षा मन्त्रालयले आईबी कार्यक्रमका नाममा सञ्चालन भएका विद्यालयमा छोराछोरी भर्ना नगर्न आग्रह गरेको छ ।  सरकारको स्वीकृति विना नेपालका केही विद्यालयले स्विजरल्याण्डको आईबी कार्यक्रम सञ्चालन गरेको विषयलाई 'अवैध आईबी' शिर्षकमा एडुखबरले समाचार प्रकाशन गरेको भोलिपल्ट मन्त्रालयले उक्त आग्रह गरेको हो । उक्त समाचारमा ध्यानाकर्षण भएको भन्दै मन्त्रालयले  शुक्रबार सूचना जारी गरेको छ । 

शिक्षा मन्त्रालयबाट युलेन्स स्कूल र प्रिमियर स्कूलले ११ र १२ मा आईबी डीपी कार्यक्रमको मात्रै अनुमति लिएका छन् । यस बाहेक अरु कुनै पनि विद्यालयले आईबी कार्यक्रमको अनुमति लिएका छैनन् । प्रिमियरले ११ र १२ को अनुमति लिएर कक्षा १ देखि १० सम्म आईबी कार्यक्रम सञ्चालन गरिरहेको छ ।

त्यस्तै काठमाडौं तीनकुनेको ह्वाइट हाउस, टोखाको काठमाडौं युरो स्कूल, सानो भर्याङको स्वस्तिश्री गुरुकुलले अवैैध रुपमा आईबी कार्यक्रम सञ्चालन गरिरहेका छन् । त्यस्तै ललितपुर एकान्तकुना स्थित माछापुच्छ्रे स्कूल, जिनियस स्कूल र पोखराको फिष्टेल एकाडेमीले अवैध रुपमा आईबी सञ्चालन गरेका छन् । यी विद्यालयले सञ्चालन गरेको आईबी कार्यक्रम कानुन विपरीत भएको भन्दै कारवाहीको दायरामा ल्याउनु पर्ने मन्त्रालयले जनाएको छ । 

सूचनामा भनिएको छ,‘मन्त्रालयको अनुमति विना सञ्चालन भइरहेको भनी विभिन्न सञ्चार माध्यममा प्रकाशित समाचार प्रति यस मन्त्रालयको गम्भिर ध्यानाकर्षण भएको छ ।’ 

आईबी कार्यक्रम सञ्चालन अनुमति नै प्राप्त नगरी सञ्चालन भएका संस्थामा आफ्ना बालबालिका भर्ना नगर्न मन्त्रालयले आग्रह गरेको छ । 

‘सञ्चालन अनुमति नै प्राप्त नगरी सञ्चालनमा रहेका कलेज/शिक्षण संस्थामा आफ्ना बालबालिकालाई भर्ना नगर्न नगराउन हुन सूचित गरिएको छ’ मन्त्रालयले जारी गरेको सूचनामा भनिएको छ । 

यसरी अनुमति विना सञ्चालन भएका कलेज र संस्थालाई कारवाहीको दायरामा ल्याउने मन्त्रालयले जनाएको छ । मन्त्रालयले जारी सूचनामा ‘अनुमति नै नलिई सञ्चालनमा भएका यस प्रकारका कलेज/शिक्षण संस्थाहरुलाई कानुन बमोजिम भई जाने व्यहोरा समेत सूचित गरिन्छ,’ मन्त्रालयले जारी गरेको सूचनामा उल्लेख छ । 

शिक्षा मन्त्रालयले शुक्रबार जारी गरेको सूचना :

विदेशी शैक्षिक कार्यक्रम सञ्चालन गर्न नेपालको कानुनले निषेध गरेको छ । कार्यक्रम सञ्चालन गर्न विद्यालय शिक्षा मन्त्रालयमा दर्ता गर्नु पर्ने कानुनी व्यवस्था छ ।