काठमाडौं - प्रतिनिधि सभाको शिक्षा, स्वास्थ्य तथा सूचना प्रविधि समितिको सभापतिको निर्वाचन बुधबार हुने भएको छ । 

यस अघिका सभापति भानुभक्त जोशी संघीय मामिला तथा सामान्य प्रशासन मन्त्री नियुक्त भएपछि समितिको सभापति पद रिक्त छ । समितिको सभापतिमा जोशी कै दल एकिकृत समाजवादीको दावी छ ।

एकिकृत समाजवादीले आफ्ना सांसद अम्मर बहादुर थापाको* नाम तय गरेको छ । कृषि, सहकारी तथा प्राकृतिक श्रोत समितिका सदस्य रहेका थापालाई शिक्षा समितिको सभापति बनाउने निर्णय भएको उक्त दलका नेता राजेन्द्र पाण्डेले बताए । यदी सत्ताधारी गठबन्धनमा विमती नभएमा उनी नै सभापति हुने लगभग निश्चित छ ।  समितिको सभापतिका लागि आफ्नो उम्मेद्वारी हुने थापाले बताए । उनी दैलेख १ का सांसद हुन् ।  

समितिमा विद्यालय शिक्षा विधेयक, नेपाल विश्वविद्यालय विधेयक, सुरक्षित मुद्रण, सार्वजनिक सेवा प्रशारण विधेयक छलफलककै क्रममा रहेका छन् । समिति सभापति विहीन भएपछि यी विधेयक माथि छलफल हुन सकेको छैन । 

प्रतिनिधि सभाको सोमबार बसेको बैठकले सभापति निर्वाचनको मिति तय गरेको हो । सभापतिको निर्वाचन सम्बन्धी तालिका संसद्का महासचिव पद्यप्रसाद पाण्डेयले सार्वजनिक गर्नेछन् ।

*सच्याईएको - सं.