आइतबार, २४ मंसिर २०८०
धुलिखेल-काठमाडौं विश्वविद्यालयले नेपाल बाल सङ्गठनमा हुर्केर १२ कक्षा अध्ययन गरेका विद्यार्थीलाई छात्रवृत्ति दिने भएको छ । नेपाल बाल सङ्गठनद्वारा सञ्चालित बाल गृहहरूमा संरक्षित कक्षा १२ उत्तीर्ण गरेका बालबालिका मध्ये कम्तीमा दुई जनालाई काठमाडौं विश्वविद्यालयका शैक्षिक कार्यक्रममा अध्ययनको लागि पूर्ण छात्रवृत्ति दिन लागेको हो ।
विश्वविद्यालय र बाल सङ्गठन बिच आइतबार विश्वविद्यालय परिसर धुलिखेलमा यस बारेमा सम्झौता समेत भएको छ ।
विश्वविद्यालयका तर्फबाट स्कुल अफ इन्जिनियरिङका डीन मनिष पोखरेल र नेपाल बाल सङ्गठनका तर्फबाट अध्यक्ष विद्या उपाध्याय न्यौपानेले सम्झौता पत्रमा हस्ताक्षर गरेका छन् ।
सम्झौता अनुसार बाल सङ्गठनको उत्थान र प्रगतिका लागि विश्वविद्यालयले सहकार्यको वातावरण निर्माण गर्नु पर्नेछ । यसका लागि विश्वविद्यालयले बाल सङ्गठनको पाँचखाल, काभ्रेमा रहेको जमिन भाडामा लिएर त्यहाँ इन्जिनियरिङ अध्ययन तथा अध्यापनका सम्भावना खोज्ने, पुरानो भवनको जीर्णोद्धार गर्ने तथा नयाँ संरचना निमगण गर्ने सहमति भएको छ ।
सम्झौता हस्ताक्षर कार्यक्रममा बोल्दै काठमाडौं विश्वविद्यालयका कुलपति प्रा डा भोला थापाले छात्रवृत्ति मार्फत बालबालिकाको भविष्यसँग जोडिन पाउँदा विश्वविद्यालयलाई गर्व लागेको बताए । बाल सङ्गठनका अध्यक्ष विद्या उपाध्याय न्यौपानेले काठमाडौं विश्वविद्यालयसँगको सहकार्यमा सङ्गठनमा आश्रित बालबालिकालाई उज्यालो भविष्य दिलाउन पाएकोमा खुसी व्यक्त गरिन् ।
“काठमाडौं विश्वविद्यालयजस्तो शिक्षामा अग्रणी र दूरदर्शी शैक्षिक संस्थासँग सहकार्य गरेकोमा बालबालिकाको भविष्यलाई लिएर हामी खुसी छौँ,” न्यौपानेले भनिन् ।
दश वर्षमा नवीकरण हुने गरी दुई पक्षबिच सम्झौता भएको हो ।
नेपालका ७७ वटै जिल्लामा शाखा भएको बाल सङ्गठनमा हाल ३६० भन्दा बढी बालबालिका संरक्षित छन् ।
प्रतिक्रिया