काठमाडौ - शिक्षा मन्त्रालयको योजना तथा अनुगमन महाशाखा दुई सातादेखि प्रमुख विहीन भएको छ । शिक्षामन्त्री अशोककुमार राईले मन्त्रालयको नियमित काम क्वाटरबाटै गरे पनि योजना महाशाखा प्रमुखको जिम्मेवारी भने कसैलाई दिएका छैनन् । 

दाताहरु (एडीबी, इयु, फिनल्याण्ड, जीपीई, आइडीए, नर्वे, युनिसेफ, युएसएड) सहित सहभागि भएकोे विद्यालय शिक्षा क्षेत्र योजनाको समीक्षा बैठक पनि महाशाखा प्रमुख विहिन नै सकिएको छ । महाशाखा प्रमुख सहसचिव हुन्छन् । मंसिर ११ देखि १५ सम्म दातासंगको संयुक्त समीक्षा बैठक भएको थियो । यस्ता बैठक योजना महाशाखा प्रमुखको अध्यक्षतामा हुने बिगत देखिको अभ्यासलाई समेत लत्याएर शिक्षामन्त्री राईले अर्कै महाशाखा प्रमुखलाई अध्यक्षताको लागि जिम्मेवारी दिएका थिए । 

यस पालीको ‘मिसन’ को अध्यक्षता मन्त्रालयको विद्यालय शिक्षा महाशाखा प्रमुख केशव दाहालले गरेका थिए । 

‘योजना कार्यान्वयन गर्ने व्यक्ति नै नभई यसपालीको मिसन सकियो । एक जना सहसचिवलाई महाशाखाको जिम्मेवारी दिन नसक्ने कस्तो संयन्त्र होला ? भन्ने हामी बीच समिक्षा भयो’ शिक्षामा लगानी गरिरहेको एक दाताका प्रतिनिधिले भने । महाशाखा प्रमुख तोक्न मन्त्री स्तरीय निर्णय गरे पुग्छ । शिक्षामन्त्री कानको शल्यक्रिया गरेपछि क्वाटरमै आराम गरेर बसिरहेका छन् ।

‘ब्रिफिङ र अरु निर्णय गर्न र कार्यकर्ता भेट्न हुने अनि महाशाखा प्रमुख नियुक्ति गर्न नहुने के हो बुझ्नै सकिएन’ मन्त्रालयका एक कर्मचारीले भने । 

मन्त्रीस्तरीय निर्णय गर्न र बिफ्रिङ गर्नु पर्यो भने कर्मचारीहरु फाइल लिएर क्वाटरमा जाने गरेका छन् ।

योजना महाशाखाका तत्कालिन प्रमुख डा. हरिप्रसाद लम्साल गत मंसिर १ गते सुदुरपश्चिम प्रदेशको प्रमुख सचिव भए सँगै उक्त पद खाली भएको हो । यो महाशाखामा प्रमुख हुन पाठ्यक्रम विकास केन्द्रका महानिर्देशक बैकुण्ठ प्रसाद अर्याल र मन्त्रालयको प्राविधिक तथा व्यावसायिक शिक्षा महाशाखा प्रमुख शिवकुमार सापकोटाले रुची देखाएका छन् । 

फोटो : शिक्षा मन्त्रालय