काठमाडौं - प्राध्यापक माथि कालोमोसो दलेको आरोपमा पक्राउ परेका सत्ताधारी दल निकट नेपाल विद्यार्थी संघका नेता तथा कार्यकर्ता निलम्बनमा परेका छन् । पूर्वाञ्चल विश्वविद्यालय सेवा आयोगका अध्यक्ष प्रा.डा. महेश दाहालमाथि कालोमोसो दलेको आरोपमा पक्राउ परेका संघका मोरङ अध्यक्ष सरोज पोखरेल सहितका नेता कार्यकर्तालाई निलम्बन गरेको नेविसंघले जनाएको छ । 

छानबिनका क्रममा कालोमोसो दलेको पुष्टि भए पछि केहीलाई निलम्बन गरिएको र केहीलाई नसियत दिईएको संघका अध्यक्ष दुजाङ शेर्पाद्वारा जारी विज्ञप्तिमा उल्लेख छ । कालोमोसो दल्नु नेविसंघको आदर्श, मूल्य–मान्यतावको विपरीत भएकोले कारवाही गरिएको विज्ञप्तिमा उल्लेख छ । 

शिक्षक प्राध्यापकलाई मोसो दल्ने बढ्दो घटना रोक्न नेपाली काँग्रेसले त्यस्तो कार्य गर्ने कार्यकर्तालाई निष्कासन गर्ने निर्णय गरेको छ । साउन २ गतेबाट शुरु भई चार दिन अघि सकिएको केन्द्रीय समिति बैठकले आन्दोलनका नाममा उश्रृङ्खल गतिविधि गर्नेलाई सम्बन्धित पार्टी संरचनाले निष्कासन गर्नसक्ने निर्णय गरेको थियो । 

गत जेठ २९ गते दाहाललाई कालोमोसो दलेको भिडियो सामाजिक सञ्जालमा भाईरल भए पछि सुनसरी र मोरङ प्रहरीको संयुक्त टोलीले मोरङको बुढीगंगाबाट जेठ ३१ गते पोखरेललाई पक्राउ गरेको थियो । 
विश्वविद्यालय सेवा आयोगको कार्यालयले कालोमोसो दलेको घटनामा पोखरेल सहित ३ जनाविरुद्ध किटानी जाहेरी दिएको थियो ।

विभिन्न शैक्षिक संस्थामा हुने कार्यक्रममा काँग्रेस निकट विद्यार्थीले शिक्षक प्राध्यापक माथि मोसो दल्ने कार्य गर्दै आएको भन्दै व्यापक आलोचना हुँदै आएको छ ।