भक्तपुर - शिक्षक सेवा आयोगले शिक्षक अध्यापन अनुमति पत्र (लाईसेन्स) परीक्षाको तयारी अन्तिम चरणमा पुर्याएको जनाएको छ । यही महिना भित्र परीक्षाको सूचना जारी गर्ने गरी काम भईरहेको आयोगका प्रशासकीय प्रमुख डा. तुलसी थपलियाले जानकारी दिए । आयोगले यस पटक अनलाईन बाटै फारम भर्न सक्ने प्रणालीको विकास गरेको छ । फारम भर्दा शुल्क भुक्तान पनि अनलाईनबाटै गर्ने गरी सोचिए पनि त्यस अनुसार प्रणाली विकास गर्न तत्काल नसकिने भएकाले यस पटक भौचर स्क्यान गरेर फारम भर्ने तयारी गरिएको उनले बताए । परीक्षार्थीले बैंकमा बुझाएको भौचरको स्क्यान गरेर फारम सँगै अनलाईन मार्फत् बुझाउने प्रणालीको विकास गर्न लागिएको उनको भनाई छ ।  

'हामीले यस पटकबाट शुरु गर्न लागेको अनलाईन मार्फत् फारम भर्ने प्रणालीमै शुल्क भुक्तान गर्ने तयारी गरेका थियौं तर यो तत्काल सम्भव नहुने जस्तो भएपछि भौचर स्क्यान गरेर फारम भर्ने तयारी गरेका छौं' उनले भने 'यो महिना भित्रमा विज्ञापन सार्वजनिक गर्ने गरी कार्य भईरहेको छ ।'

आयोगले यसपटक मावि र निमावि तहमा विषयगत लाईसेन्स परीक्षाको तयारी गरेको छ । यस अघि परीक्षार्थीले समग्र विषयको परीक्षा दिएर लाईसेन्स लिने व्यवस्थालाई परिवर्तन गरेर आयोगले जुन विषय शिक्षक हो त्यही विषयको लाईसेन्स परीक्षा दिने ब्यवस्था गरेको हो । प्राथमिक तहमा भने विषयगत लाईसेन्न हुँदैन । अँग्रेजी, नेपाली र गणितका लागि एउटै परीक्षा हुने छ । 

'विषयगत पाठ्यक्रम स्विकृत भईसकेको छ, सोही आधारमा जुन विषय पढाउने हो त्यही विषयका शिक्षक तयारी गर्ने योजना हो' उनले भने, 'यस पटक हामीले मार्किङ् मेसिनको प्रयोग पनि गर्दै छौं ।' 

नयाँ व्यवस्थाबाट ब्यक्ति र राज्य दुवैको खर्च कम हुने आयोगको अपेक्षा छ । परीक्षा फारम भर्दा व्यक्ति सम्बन्धित कार्यालय सम्म पुग्नु पर्ने झण्झटबाट मुक्ति मिल्नुका साथै त्यसका लागि हुने खर्च पनि जोगिने थपलियाले अपेक्षा गरे । यस्तै फारम संकलनका लागि हरेक जिल्लामा एक महिना सम्म हुने जनशक्ति परिचालनको खर्च पनि जोगिन्छ । 

'अनलाइन फारम भर्दा केन्द्रहरुमा भिडभाड नहुने त भै हाल्यो, त्यसका अलावा फारम संकलनका लागि परिचालन हुने झण्डै ३ सय जनशक्ति माथि हुने थप खर्च पनि जोगिने भयो' उनले भने 'यसका लागि हुने झण्डै एक करोड रुपैंया राज्यको बचत हुन्छ ।'

यस अघि आयोगले २०७३ सालमा लाईसेन्स परीक्षा सञ्चालन गरेको थियो । अहिले सम्म आयोगले झण्डै सातलाख धेरैलाई लाईसेन्स दिएको छ । एकै जनाले विभिन्न तहको लाईसेन्स लिएका र कतिपयको उमेर हद कटिसकोले पनि अहिले लाईसेन्स भएकाहरुको यकिन तथ्याङ्क छैन ।